Rusi: Pastruesja e zyres së kryetarit e mund shefin e saj nga partia e Putinit në zgjedhje

Tash, pastruesja 35 vjeçare po lë pluhurat për t’u ulur në zyren e shefit të saj, pasi fitoi zgjedhjen më herët gjatë këtij muaji – në të cilat hyri për t’ia mundësuar rizgjedhjen atij.

Kur askush në fshat nuk nënshkroi që ta sfidonte Nikolai Loktevin, që është nga partia pro-Kremlin, ai bindi znj.Udgoskaya që të regjistrohej si “rivalja” e tij për të siguruar minimumin e kërkuar të dy kandidatëve.

Por plani i tij iu kthye si mos më keq dhe pastruesja fitoi zgjedhjet bindshëm, raporton BBC, përkthen Periskopi.

“Nikolai Loktev mendoi që askush nuk do të votonte për të dhe se do ta mbante detyrën. Por njerëzve iu bë boll dhe dolën e e zgjodhën Marina Udgodskayan,” tha një anëtar i komisionit lokal të zgjedhjeve.

“Ai mbeti i mahnitur e ajo e shtangur!” një grua që nuk donte të identifikohej tha.

Ajo thotë ta ketë dëgjuar personalisht z.Loktev t’i kërkonte pastrueses që të dilte kundër tij.

Znj.Udgodskaya u vërshua nga thirrjet telefonike pasi fitorja e saj befasuese mori kryetitujt e lajmeve.

“Nuk bëra kurrgjë”

Prej asaj kohe, ajo nuk po përgjigjet më në telefon dhe po rri larg vëmendjes së mediave para inaugurimit në fund të kësaj jave.

Por në një intervistë të hershme ajo u duk e befasuar me fitoren e saj, duke e përshkruar veten si kandidate “false” që nuk ishte gati për një “promovim kaq rapid”.

“Nuk mendoj që njerëzit do të votonin përnjëmend për mua,” tha ajo. “Unë nuk bëra kurrgjë hiç!”

Sidoqoftë, ajo ia doli t’i fitonte 62 për qind të votave. Shefi i saj i mori vetëm 34 për qind.

Asnjëri kandidat nuk kishte bërë fushatë aktive gjatë zgjedhjeve: pa billborde, pa afishe, pa takime me votues.

Fshati i Povalikhinos është më i madhi në një rajon me 30 fshatra. I ka vetëm 242 banorë.

“Kam bërë gjithçka që kam mundur; nuk ka probleme në fshat,” tha z.Loktev për BBC-në, duke mos arritur ta kuptonte humbjen.

“Është e qartë se njerëzit duan ndryshim,” shtoi 58 vjeçari.