Lista Srpska kërkon nga ndërkombëtarët të reagojnë për sulmin e mbrëmshëm në Bernicë

Përmes një statusi në Facebook, Lista Serbe po kërkon nga autoritetet të hetojnë rastin dhe t’i dënojnë fajtorët.

“Ekzistenca e videove që regjistruan sulmin ndaj fëmijëve të pafajshëm është e mjaftueshme për t’i treguar policisë se ata janë të gatshëm për të mbrojtur qytetarët por gjithashtu privojnë liritë e atyre që shkelin ligjin, pavarësisht nga kombësia e viktimave ose sulmuesve”, thuhet në reagim.

Lista Serbe po kërkon nga bashkësia ndërkombëtare të reagojë më shpejtë për këtë rast.

Ndërkohë, për të shtënat me armë zjarri ka njoftuar edhe Policia e Kosovës në raportin 24 orësh.

“Fsh. Bernicë e Poshtme, Prishtinë (NN) 03.10.2020-19:20. Dy dëshmitarë  meshkuj kosovarë, kanë raportuar se derisa ka qenë në oborrin e shkollës, dy të dyshuar meshkuj të panjohur pas konfrontimit në të larguar njëri prej tyre ka shtënë me armë zjarri (nuk dihet drejtimi). Në vendin e ngjarjes janë dal njësitet relevante policore, ku është gjetur dhe sekuestruar një gëzhojë. Rasti vazhdon të hetohet”, thuhet në raportin e policisë.

“Ajo armë u drejtua të gjithë serbëve në Kosovë mbrëmë, dhe bashkësia ndërkombëtare duhet të reagojë në mënyrë më urgjente. Ne mendojmë për KFOR’in dhe EULEX’in të cilët janë të mandatuar të sigurojnë një mjedis të sigurt për të gjithë”, thuhet në reagim.

Lista Serbe ka akuzuar policinë për mungesë të vullnetit për të mbrojtur komunitetet joshumicë në vend.

“Vetëm me fat nuk kishte të plagosur dhe të vdekur natën e kaluar, por pasojat janë më shumë se të dukshme, dhe ato reflektohen përmes agjitacionit të të gjithë popullit serb. Ky rast është një shembull tjetër i reagimit të papërshtatshëm të policisë dhe mungesës së vullnetit për të mbrojtur komunitetet jo-shumicë, duke thelluar kështu mosbesimin e serbëve në institucionet e Kosovës”, thuhet në reagimin e Listës Serbe.