Thaçi thirrje prokurorëve të Kosovës: Mos i bëni gabimet e njëjta si UNMIK-u e EULEX-i

Presidenti i vendit Hashim Thaçi, ka porositur kryeprokurorin dhe gjithë prokurorëve të Kosovës që të mos i bëjnë gabimet e njëjta sikur administrata e UNMIK-ut dhe EULEX-it, që i amnistuan krimet serbe në Kosovë.

“Gjenocidi serb, spastrimi etnik, qindra masakra dhe mijëra dhunime, në 20 vjetët e fundit asnjëherë nuk janë gjykuar dhe kriminelët serbë vetëm janë amnistuar e shpërblyer, duke u sistemuar në strukturat më të larta të shtetit serb”, ka deklaruar Presidenti.

Thaçi ka theksuar se shqiptarët kanë qenë viktima dhe tash e 20 vjet janë duke u hetuar e dënuar në një proces më të gjatë se hetimet e krimeve të Luftës së Dytë Botërore.

“Tash është koha që sistemi ynë i drejtësisë, pa ndikime nga politika apo nga përfaqësuesit diplomatikë t’i hetojnë, gjykojnë dhe dënojnë kriminelët serbë që vranë rreth 13 mijë civilë shqiptarë, në mesin e të cilëve rreth 1300 ishin fëmijë, që dhunuan mbi 20 mijë gra shqiptare dhe kryen mbi 400 masakra në Kosovë”, ka deklaruar Presidenti i vendit./Periskopi/