Thaçi: Serbia po mohon masakrën e Reçakut si rezultat i heshtjes së ndërkombëtarëve

Presidenti i Kosovës, Hashim Thaçi i shoqëruar nga homologu i tij nga Shqipëria Ilir Meta, ka bërë sot homazhe në kompleksin memorial në  Reçak, në 21 vjetorin e masakrës së Reçakut.

“Jemi së bashku këtu me presidentin e Shqipërisë për të bërë nderimet më të larta shtetërore për të masakruarit. Maskara e Reçakut është gjenocid i kryer nga shteti i Serbisë kundër popullit të Kosovës por kjo sensibilizoi të gjithë opinionin ndërkombëtar për të qartësuar se Serbia po kryente krime kundër njerëzimit në Kosovës”, ka thënë Thaçi,

Presidenti ka theksuar se Kosova ende kërkon që të zbardhen krimet jo vetëm të masakrës së Reçakut por edhe të gjitha tjerave që kanë ndodhur në Kosovë.  Ndërsa  është shprehur i indinjuar me drejtësinë ndërkombëtare.

“Drejtësia ndërkombëtare ende nuk ka zbardhur rastet e masakrave në Kosovë, ka heshtur edhe në dhunimin e rasteve të 20 mijë grave, por sidoqoftë udhëtimi jonë është euroatlantik ne duhet ta konsolidojmë shtetin”, tha presidenti.

Tutje, Thaçi ka thënë se presidenti i Serbisë, Aleksandar Vuçiq ka pas një sjellje të mentalitetit të Sllobodan Millosheviqit duke tentuar t’i mohojë krimet e kryera nga Serbia në Reçak.

“Është një sjellje e mentalitetit të Sllobodan Millosheviqit por kjo sjellje ka ardh si rezultati heshtjes ndërkombëtare për masakrën e Reçakut, ishte një shtytje dhe guxim i autoriteteve të Serbisë që t’i mohojnë krimet në masakrën e Reçakut”, ka deklaruar  Thaçi./Periskopi/