Mandatimi i Kurtit: Të gjitha deklaratat e zyrtarëve të VV-së ku i kërkojnë marrëveshje LDK-së

Pas nomiminit të Albin Kurtit për kryeministër, zyrtarë të Vetëvendosjes kanë reaguar duke kërkuar koalicionin me LDK-në.

Haki Abazi i Vetëvendosjes e njëherit i nominuar i Kurtit për pozitën e zëvendëskryeministrit, ka thënë se krijimi i qeverisë Kurti është realizim i vullnetit qytetar të 6 tetorit.

“Krijimi qeverisë Kurti është realizimi i vullnetit qytetar të 6 tetorit. Mosformimi në anën tjetër është vazhdim i kapjes së shtetit, vazhdim i krimit dhe korrupcionit dhe kontrollit të institucioneve nga monopolet dhe atyre që po kundërshtojnë koalicionin LVV- LDK për interesa te tyre klanore e grupore”, shkruan Abazi në Facebook.

Edhe Albulena Haxhiu e VV-së, ka shkruar se pas nominimit të sotëm të Kurtit për kryeministër, është radha që LDK të tregojë nëse vërtet e do ndryshimin.

“Sot, dorëzuam emrin e mandatarit. Mandatari ynë do të jetë ai që ka marrë mbështetjen më të madhe nga qytetarët e Republikës sonë më 6 tetor, Albin Kurti. Jo më vonë se 15 ditë, kandidati ynë, duhet të paraqes përbërjen e Qeverisë para Kuvendit.
Këto ditë janë shans ideal për të marrë vendimin historik në përputhje me vullnetin e qytetarëve. Për të jetësuar vullnetin e qytetarëve të shprehur më 6 tetor, ne kemi bërë shumë kompromise. Është radha që LDK, të tregojë se e do vërtetë ndryshimin”, shkruan Haxhiu në Facebook.

Arbërie Nagavci, po ashtu shkruan se prej sot, VV dhe LDK duhet të ‘përmbushin shpresat për ndryshim’.

Znj.Nagavci shkruan në FB:

“Albin Kurti, personi më i votuar në zgjedhjet parlamentare, është i mandatuari për formimin e Qeverisë së Republikës së Kosovës. Sot dërguam dhe formalisht propozimin e LV! si fituese e zgjedhjeve.  Tani më nuk ka dhe shumë kohë, 15 ditë nga nesër Albin Kurti duhet të paraqes përbërjen e Qeverisë para Kuvendit.
Nuk mund të presim në pafundësi, nuk mund të rrezikojmë miratimin e buxhetit e krijimin e situatave të vështira financiare në qindra mijëra familje e as të bllokojmë krijimin e institucioneve. Ne po bëjmë hapa përpara në jetësimin e vullnetit të qytetarëve të shprehur me 6 tetor, po angazhohemi për krijimin e një Qeverie që do të luftojë krimin e korrupsionin, që do të punoj shumë për zhvillimin ekonomik e përmirësimin e jetës së qytetarëve, për mundësitë e reja e hapjen e perspektivave për të rinjët tanë. Kemi besuar se në këtë rrugëtim do të jemi bashkë me LDK-në, në realizimin e programit për të cilin jemi pajtuar tashmë, andaj jemi angazhuar e do të punojmë edhe ditëve në vijim që kjo të arrihet. Nuk mund të kthehemi në të kaluarën, në rrugën përpara duhet ulur në tavolinën e bisedimeve deri në arritjen e marrëveshjes, votimin e Qeverisë Kurti dhe fillimin e punës. Bashkë me LDK-në duhet të përmbushim shpresat për ndryshim. Kjo është mundësia e fundit për të jetësuar vullnetin e qytetarëve, për t’u shkëputur përfundimisht nga qeverisjet e papërgjegjshme që shkaktuan largimin e qindra mijëra qytetarëve rrugëve të botës. Skenaret që pengojnë realizimin e vullnetit të qytetarëve nuk mund dhe nuk duhet të ngadhnjejnë mbi zërat racional që duhet t’I dëgjojmë këto ditë. Është koha që premtimet t’i bëjmë realitet, që besimin që na e kanë dhënë, ta kthejmë në votimin e Qeverisë së ndryshimit. Qytetarët kanë folur me 6 tetor, të zgjedhurit e tyre do të flasin pas dy jave, me shpresën që do të përmbushin besimin e dhënë”./Periskopi/