Ish studentja e Oksfordit: Ata që i besuan Kurtit tash s’mund ta besojnë sa shpejt u çmitizua

Haradinaj-Stublla e quan të turpshme sjelljen e Albin Kurtit pas videos së publikuar dy orë më herët e në të cilën kryetari i Vetëvendosjes njoftoi se do t’i dërgonte emrin e mandatarit presidentit Thaçi.

Ajo thotë se nominimin për mandatar Kurti nuk duhej ta dërgonte në Presidencë pa pasur marrëveshje për qeverinë me LDK-në – “përveç nëse qëllimi yt është të shkaktosh akoma më shumë vonesa, e ta dërgosh vendin në zgjedhje prapë!”

Më tej, zonja në fjalë e quan “të turpshëm” refuzimin që VV-ja i bëri ofertës së LDK-së për të formuar qeverinë për shkak të pozitës së kryeparlamentarit, pozitë të cilën ajo e quan të fituar me “tregti për ta kompensuar koncesionin që e bëre me postin e Presidentit:”, përcjell Periskopi.

“Aftësitë tua për të tregtuar pozita për pushtet i përjetuam kur dëgjuam se si tentoje të përfitosh duke ofruar ‘heqjen dorë’ nga emrat e të nominuarve për zvKM të dytë, Ministër të Jashtëm, e Ministre të Ekonomisë. – vijon më tej Haradinaj, këshilltarja e kryeministrit Haradinaj.

Më poshtë mund ta lexoni të plotë reagimin e saj në Facebook:

OPOZITA ME SHTETIN

E turpshme se si Albini po vazhdon opozitëbërjen me shtetin e Kosovës dhe me qytetarët e saj.

Sovrani ia dha mandatin për kryeministër, ai bën hajgare me të. Bën hajgare me procedurat kushtetuese, dhe me rregullat e demokracisë. I dhunon e përçmon ato si të ishte diktator.

Albin, nominimi për mandatar nuk dërgohet në Presidencë pa i pasë numrat e dakorduar – përveç nëse qëllimi yt është të shkaktosh akoma më shumë vonesa, e ta dërgosh vendin ne zgjedhje prapë! Shansën e dhënë nga LDK-ja e refuzove paturpësisht, për një pozitë të kryeparlamentarit, të cilën e fitove me tregti për t’a kompensuar koncesionin që e bëre me postin e Presidentit.

Aftësitë tua për të tregtuar pozita për pushtet i përjetuam kur dëgjuam se si tentoje të përfitosh duke ofruar ‘heqjen dorë’ nga emrat e të nominuarve për zvKM të dytë, Ministër të Jashtëm, e Ministre të Ekonomisë. Këtë aftësi e vullnet tregtar nuk mund ta fshehësh me kundërshtimin taktik të heqjes dorë nga pozita e Kryeparlamentarit. Tani po të njohim të gjithë, por ata që besuan në ty, nuk po munden me e përcjellë e me pranu shpejtësinë e ç’mitizimit tënd.

Po e përsëris që në demokraci, me vetëm 26% nuk mund t’i marrësh të gjitha. Të gjitha urat që i ke rrënuar dje, do të jetë e pamundshme t’i ndërtosh brenda natës për të kaluar lumin e të bëhesh kryeministër.

Kur e vendos veten para demokracisë, përfundon si sot në atë video: i dëshpëruar duke mohuar të dyja! Paç veten në qafë!