Historianët e Deçanit ia pështjellin William Walkerit, i japin një çmim por s’i tregojnë ku ta marrë

Sot, kjo lidhje historianësh të kësaj komune, që nuk dihet se sa anëtarë ka ose se si funksionon, do të dorëzojë titullin “Krenaria e Kombit shqiptar” për Ambasadorin William Walker, mbiemri i të cilit në versionin deçanas do të përkthehej në William Walkeraj.

Si dhe për kombin shqiptar të autorizuar që të japin çmime mund të jenë më kompetente komunat e Republikës së Shqipërisë.

Nuk dihet nëse z.Walker do të denjojë që të marrë një titull të tillë nga kjo degë e lidhjes së historianëve, shkruan Periskopi.

Por, në rast se veprimin e kësaj dege historianësh nga Deçani vendosin ta bëjnë edhe të gjitha degët e tjera të historianëve nëpër Kosovë, atëherë z.Walker do t’i duhej ta bënte një tur mjaft të gjatë nëpër të gjitha qytetet e qytezat e vendit tonë. Mjaft e lodhshme, apo jo?

Sidoqoftë, në njoftim thuhet se në ceremoni pritet të jetë i pranishëm ambasadori Walker për të marrë çmimin, por edhe kryetari i Komunës, z.Bashkim Ramosaj.

Ngjarja mbahet në ora 13:00, por një gjë tjetër që shqetëson është edhe salla. Thuhet se kjo sallë ndodhet në katin e katërt të sallës edhe pse nuk jepen sqarime nëse kjo ndërtesë ka ashensor. Megjithatë, në një faqe tjetër thuhet se z.Walker mund ta marrë çmimin edhe në katin e tretë të Komunës, por menjëherë në një faqe tjetër përsëritet që çmimi mund të merret në katin e katërt. Pështjellime të zakonshme burokratike të komunave tona./Periskopi