Flet deputeti i LDK-së pas takimit me Walker: Besojmë që koalicioni me LVV-në do të ndodhë

Deputeti i Lidhjes Demokratike të Kosovës, Haxhi Avdyli, ka folur pas takimit të Ish-shefi i misionit të OSBE-së, William Walker që ua bëri në selinë e partisë.

Avdyli tha se arsyeja e vizitës së Wallker ka qenë për tu informuar në lidhje me rrjedhën e bisedimeve mes LVV-së dhe LDK-së, shkruan Periskopi.

‘’Shprehi dëshirën të informohet rreth zhvillimeve në Kosovë dhe rreth bisedimeve për marrëveshjen e koalicionit me VV-në. Nënkryetarja e partisë, Vjosa Osmani e ka informuar për të gjitha zhvillimet që kanë ndodhur deri tani’’, tha Avdyli.

Tutje, deputeti komentoi edhe takimet e fundit të bëra mes dy liderëve, Kurti dhe Mustafës. Avdyli thotë se janë shterur të gjitha mundësitë dhe se bisedimeve u ka ardhë fundi.

‘’Janë shterur të gjitha mundësitë dhe kanë mbet vetëm edhe disa detaje të vogla për t’i biseduar’’.

Ai ka shprehur besimin se koalicioni do të ndodhë. Ndërsa, thekson se LDK nuk e ka parë si pengesë postin e kryeparlamentarit meqenëse ekzistojnë formula të tjera për të arritur marrëveshje dhe shpreson që koalicioni të ndodh mes VV dhe LDK.

‘’Ne shpresojmë dhe besojmë që sa më shpejt të ndodhë koalicioni qe e kanë votu qytetarët. Besojmë shumë që ky koalicion do të ndodhë, i kuptojmë qytetarët që janë lodhë duke pritë kaq gjatë. Por, përfundimi i këtij koalicioni do të jetë në të mirë të qytetarëve. Jam optimist që do të gjendet formula e duhur që LDK të ndihet komode në atë qeveri’’, përfundon Avdyli./Periskopi/