Albin Kurti u tall me inteligjencën e qytetarëve të Kosovës (Video)

Kurti deklaroi po ashtu se nuk mund ta pranonte ofertën e Lidhjes Demokratike të Kosovës [LDK] sipas të cilës kërkohej që pozita e kryetarit të Kuvendit t’i takonte asaj për një periudhë një vjeçare derisa të merreshin vesh për pozitën e presidentit.

LDK propozonte që sapo kjo parti të merrte pozitën e presidentit të vendit në prill të vitit të ardhshëm, Vetëvendosje të merrte mbrapsht pozitën e të parit të Kuvendit, shkruan Periskopi.

Por, interpretimi që Kurti i bën një oferte të tillë nga LDK-ja e cila haptas lëshon pe nga pozicionet e mëhershme, është tallës.

“Merre ose lëre” – është termi që përdorë Kurti në videon në fjalë duke thënë menjëherë se kjo nënkupton thjesht “lëre”. Në fakt, “merre ose lëre” nënkupton “merre ose lëre”. Vetëvendosje ka mundësi të pranojë propozimin e LDK-së dhe të formojë qeverinë e re të Republikës së Kosovës.

Por, Kurti në video-adresimet e tij vazhdon t’i mendojë qytetarët, madje edhe ata që e votuan, si analfabetë e njerëz të padinjitet të cilët mund të mashtrohen me fjalët më të thjeshta.

Për të justifikuar më tej pozicionin e tij të ngurtë karshi LDK-së, dhe refuzimin e ofertës së kësaj partie, Kurti vazhdon të përdorë edhe termin “Nuk mund të kthehemi në vitin 2019”. Një qytetar i kujdesshëm mund të shtronte pyetjen: “E pse nuk mund të ktheheni në vitin 2019 kur pikërisht në vitin 2019 ndodhën edhe zgjedhjet e 6 tetorit dhe u arritën edhe marrëveshjet për harmonizim programi?” Nuk ka ndonjë përgjigje.

Kurti ka fortifikuar një qëndrim të tillë për të mbrojtur gabimin e tij për propozimin e Glauk Konjufcës për kryetar Kuvendi, përmes të cilit gabim e bëri edhe më të vështirë arritjen e marrëveshjes me LDK-në.

Në fakt, Lidhja Demokratike e Kosovës ka fituar vetëm 1,7 për qind të votave më pak se Vetëvendosje dhe fare natyrshëm nuk mund të dakordohen me një marrëveshje sipas së cilës nuk do t’iu takonte asnjë pozitë e rëndësishme shtetërore.

Kurti e përdori edhe një tjetër justifikim për pozicionin e tij të ngurtë. Kryetari i ri i Kuvendit nuk është nga Pronto – me fjalë të tjera tha ai në video. Në fakt, Glauk Konjufca duke e ditur se sa e zorshme do të bëhej arritja e një marrëveshjeje me LDK-në, edhe vetë nuk e kishte votuar veten për kryetar kuvendi duke abstenuar më 26 dhjetor, në seancën konstituive.

Kujtojmë se Kurti edhe në të kaluarën kishte përdorur qasje elitiste ndaj qytetarëve të vendit duke poshtëruar inteligjencën e tyre. Ai kishte deklaruar se “kishte përdorur fjalor të thjeshtë ndaj liderëve shtetërorë për të mobilizuar masën” në një paraqitje televizive në Rubikon. Ndërsa në zgjedhjet komunale të vitit 2017, në shumë vende kishte thurur poezi për të dramatizuar fushatat elektorale. /Periskopi

https://www.facebook.com/albini2017/videos/188089132335119/