Akuzohej për vrasje, ky është i burgosuri që vdiq në spitalin e Pejës

I burgosuri, rreth orës 15:46 me rekomandim të mjekut të Q.K Dubravë është dërguar me urgjencë në Spitalin Rajonal të Pejës, ku përkundër ofrimit të ndihmës mjekësore ka ndërruar jetë.

“Sipas mjekut kujdestar, dyshohet se F. Ll kishte pësuar infrakt. I njëjti ishte i dënuar për veprën penale “vrasje”. Sipas procedurave, trupi i pajetë është dërguar për obduksion”, njofton Shërbimi Korrektues i Kosovës.

Mësohet se bëhet fjalë për Fatmir Llonqarin i cili vuante dënim për veprën penale ‘’Vrasje’’, shkruan Periskopi.

I ndjeri, Fatmir Llonqari ishte akuzuar se pas një mosmarrëveshje për disa drunj që i kishin prekur murin e shtëpisë, kishte marrë sëpatën dhe e kishte goditur dy herë në kokë duke e privuar nga jeta të ndjerin Idriz Gega.

Ai akuzohej edhe për tentim vrasje të Ferid Geges, djalit të viktimës, për shkak se pasi që Feridi e kishte kuptuar se i ati i tij ishte goditur me sëpatë në kokë, kishte shkuar te shtëpia e F.Llonqarit dhe duke shtënë disa herë me armë. Këtë tentim vrasje e kishte bërë në dhjetor të vitit 2008.

Në aktakuzë thuhej se Fatmir Llonqari i ishte përgjigjur të shtënave duke shtënë në drejtim të Ferid Gegës “me qëllim që ta sprapsë sulmin nga vetja”. Nga këto të shtëna, Ferid Gega kishte mbetur i plagosur.Ai po akuzohej edhe për armëmbajtje pa leje.

Llonqari kishte pranuar fajin për vrasje dhe armëmbajtje pa leje, ndërsa për tentim vrasje ishte deklaruar i pafajshëm./Periskopi/