Në votat e diasporës aplikojnë mijëra serb për zgjedhjet e 6 tetorit (Dokument)

Më 6 tetor është paraparë që të mbahen zgjedhjet ku qytetarët e Republikës së Kosovës do ta kenë mundësinë që të votojnë për partinë politike që ata e preferojnë.

Partitë politike tash e disa javë po takohen me qytetarët e vendit për të qenë më afër halleve të tyre dhe për ta shpalosur planin për udhëheqjen e vendit, shkruan Periskopi.

Këtë vit, organizimi i zgjedhjeve të jashtëzakonshme në Kosovë do t’i kushtojnë buxhetit të shtetit afër 6 milionë euro.

Të drejtë vote do të kenë edhe bashkëatdhetarët të cilët jetojnë në shtete të ndryshme të botës.

Sipas një liste të publikuar ku tregon numrin e aplikacioneve të aprovuara për shtete, numrin më të lartë të votuesve e mban Gjermania me 11449 votues pastaj Zvicra me 9842 votues dhe e treta është Serbia me 4337 votues.

Sipas një liste të publikuar në faqen zyrtare të KQZ’s, vërehet një mobilizim i mijëra shtetasve serb për të votuar në zgjedhjet parlamentare që do të mbahen në Kosovë.

Të bashkëlidhur mund ta gjeni listën e plotë me emër dhe mbiemër të secilit votues nga diaspora.

Kujtojmë se nga data 30 gusht deri më 10 shtator, qytetarët e Kosovës që jetojnë në vende të ndryshme të botës, kanë pasë mundësi që t’i mbushin formularët e tyre për të figuruar në regjistrin e votuesve nga diaspora.

Qytetarë të Kosovës të cilët jetojnë në vende të ndryshme të botës bazuar në një raport të Agjencisë së Statistikave të Kosovës llogaritet të jenë deri në 800 mijë, por, në regjistrimin e diasporës, proces i nisur nga autoritetet e Kosovës vite më parë deri më tani janë regjistruar vetëm rreth 400 mijë qytetarë./Periskopi/