Miku i Albin Kurtit në Zvicër: Vetëvendosje i do vetëm xhepat dhe votat e mërgatës, po na trajton si hambar jo si tru

Ish-aktivisti i Vetëvendosjes në Zvicër ka thënë se diskursi publik i Vetëvendosjes për mërgatën dhe qasja reale ndaj saj dallon sikur nata me ditën.

“Në diskursin publik të LVV-je vlerësohet lart roli i mërgatës, si në të kaluarën, të tashmen dhe si potencial real për të ardhmen. Mërgata sipas diskursit të saj publik është truri i kombit. Nga ekzistenca e LVV-je argumentet e tregojnë të kundërtën. Mërgata është shfrytëzuar maksimalisht si hambar. Përderisa për të shtyrë një ide ose një program përpara mundësitë gjithmonë kanë qenë minimale, shpeshherë duke hasë në veshë të shurdhër dhe në injorantë. Një gjë që çdoherë kërkohet nga mërgata dhe asnjëherë nuk është refuzuar është paraja dhe vota e saj”, ka shkruar Palushi.

Ai ka shtuar se tani kjo po bëhet në një formë edhe më të vrazhdë, si asnjëherë më parë duke iu kërkuar ndihmë financiare mërgatës me SMS, pikërisht tani kur dihet se LVV ka përfitime milionëshe nga financimi i shtetit.

“Është e turpshme që vetëm në kohë zgjedhjesh të mendosh për mërgatën. Përkatësisht për xhepat dhe votat e saj. Mërgatën gjithmonë e keni trajtuar si hambar dhe jo si tru!”, ka shkruar ish-aktivisti i Vetëvendosjes në Zvicër, duke shtuar se “meqë po kërkohet me FORWARDU, po e bëj ?”, shkruan ai.

Kreu i Lëvizjes Vetëvendosje, Albin Kurti në thuajse secilën paraqitje të tij ju bën thirrje shqiptarëve në diasporë që ta shfrytëzojnë të drejtën e tyre për votim në Kosovë.

Por megjithatë kjo parti nuk e rezervoi asnjë vend për ndonjë përfaqësues të diasporës në listën e kandidatëve për deputetë, gjë për të cilën para disa javësh kishte shkruar Periskopi.

Artikullin e plotë mund ta lexoni KËTU.