Luanesha, Traktori, Lokomotiva, Mendjebukuri, Sharmi, Hija – Misioni i Bajram Gecajt për kruarjen e ego-ve në LDK (Foto)

Disa ditë më herët ai bëri bujë kur ‘të nervozuarin’ pas nominimit të Vjosa Osmanit si kandidate për kryeministre, Agim Veliun, e quajti “bulldozher”. Në fakt, në gjuhën shqipe fjala “bulldozher” quhet ‘buldozer”, e që ka kuptimin e një “traktori me një thikë të gjerë e të fortë përpara, që shërben për të gërryer, për të sheshuar ose për të shtyer dheun.

Por, mund të hamendësojmë që Gecaj e ka cilësuar Veliun si “buldozer” për t’ia bërë qejfin në ndonjë mënyrë që mirëfilli s’e kupton as njëri e as tjetri, shkruan Periskopi.

Lutfi Hazirin, “të nervozuarin” tjetër të LDK-së, Gecaj e ka quajtur “Njëshi i Brezit të Republikës” edhe pse, Haziri më pas një muaji do t’i mbush 50 vjet dhe ka qenë në pozita të larta pushteti që nga paslufta e këndej. Sidoqoftë, edhe “njëshi” mund të merret me mend se është bërë për t’i mbushur qejfin kryetarit të Gjilanit.

Së fundi, ish ministren Hykmete Bajrami ai e quajti “Luaneshë të LDK-së”, duke nënkuptuar në këtë mënyrë karakterin e saj të sertë e të guximshëm.

Gani Gecin, z.Bajram Gecaj e ka quajtur “dora e hekurt e LDK-së” ani që dihet se ish-anëtari i LDD-së nuk ka kurrfarë fuqie brenda partisë që udhëhiqet nga Isa Mustafa.

Sali Cacajn e Junikut ai e ka quajtur “sharmi i LDK-së” edhe pse, Cacaj nuk duket aq sharmant në fotografinë e shpërndarë nga Gecaj, por si duket ky i fundit s’e ka problem të thotë atë që s’e mendon.

Më tej, Valon Murtezajn ai e quan “hija e LDK-së” gjë që e bën edhe më qesharake misionin e tij nofkë-vënës. Kuptimi i “hijes” është negativ, natyrisht, por qëllimi i Gecajt është dhënia ledhë egove të bashkëpartiakëve. /Periskopi