Hetimi për shkarkim të Trumpit: Çka do të ndodh më pas?

Spikerja e Dhomës së Përfaqësuesve, Nancy Pelosi, ka njoftuar fillimin e hetimit formal për shkarkimin e Donald Trumpit, duke e bërë atë presidentin e katërt në historinë e ShBA-ve që do të përballet me një investigim të tillë të jashtëzakonshëm.

Të tria rastet e tjera me presidentët tjerë rezultuan ose në akuzimin ose në dorëheqjen e presidentit, shkruan The Guardian, përcjell Periskopi.

Çka po bën vaki?

Pas disa muajsh presioni nga anëtarët e partisë së saj (dhe jo vetëm), Pelosi më në fund mori vendimin të martën. 30 demokratë të Dhomës së Përfaqësuesve iu bashkuan thirrjes për hapjen e hetimit zyrtar për shkarkim.

Ky presion u rrit ndjeshëm pasi Kongresi mësoi nga raportimi i një sinjalizuesi që kishte alarmuar komunitetin e inteligjencës për një bisedë që Trumpi e kishte pasur me presidentin e Ukrainës. Biseda raportohet se ka përfshirë zëvendës-presidentin Joe Biden, oponentin potencial të Trumpit për vitin 2020. Demokratët pretendojnë që Trumpi ndaloi ndihmat ushtarake pasi presioni për të marrë informacione për Bidenin nuk kishte shkuar mirë. Trumpi mohoi çdo keq-bërje edhe pse e pranoi se e kishte bërë atë telefonatë.

Qysh funksionon procedura?

Pelosi tha që gjashtë komitete kongresi së fundi po investigojnë shkelje të mundshme për akuzë. Bazuar në gjetjet e tyre, komiteti gjyqësor mund të draftojë dhe aprovojë nenet e akuzimit ndaj Trumpit, që më pas mund të shkojë në Dhomën e Përfaqësuesve për votim. Nëse këto nene kalojnë, Senati do të mbajë një proces për këtë çështje, me dy-të-tretat e shumicës që nevojiten për ta dënuar dhe dëbuar presidentin.

Më parë janë akuzuar tre presidentë të tjerë, Bill Clintoni [1998], Andrew Johnsoni [1868] dhe Richard Nixoni [megjithëse jo teknikisht sepse kishte dhënë dorëheqje]. /Periskopi