Shala i LDK’së: Nuk kemi afërsi politike me VV’në, pa e pranuar Vjosën kryeministre s’ka as dakordim

Kujtim Shala i LDK’së, thotë se kjo parti do t’i fitojë zgjedhjet me Vjosa Osmanin kryeministre. Ai ka thënë se me Vetëvendosjen nuk kanë afërsi politike, sepse kjo sipas tij, do të nënkuptonte edhe afërsi ideologjike, por kanë pasur dhe kanë vetëm bashkëpunim të mirë.

“Nuk ka dakordim për cështjen themelore, që ka të bëjë me kandidatin për kryeministër sepse ne kemi kandidaten tonë për kryeministre, kjo cështje duhet te zgjidhet, kushti themelor është pranimi i Vjosa Osmanit për kryeministre”, ka thënë Shala, përcjell Periskopi.

Ai ka thënë se nuk kanë afërsi politike me VV’në por vetëm bashkëpunim.

“Nuk e di nëse është afërsi politike, sepse së pari do të ishte afërsi ideologjike. Por në dy vitet e fundit ne si opozitë kemi bashkëpunuar mirë, sidomos për cështje tepër të rëndësishme, kjo ka krijuar raport mirëbesimi, ende po tentojmë të kemi marrëveshje bashkëpunimi.  Nuk është proces i mbyllur.  Vjosa Osmani do të jetë kandidatja fituese, do të jetë kryeministre e Kosovës.  Si kandidate për kryeministre është përfaqësuesja jonë”, ka thënë Shala në RTK, përcjell Periskopi.

Kujtojmë se edhe Ismet Beqiri i është kundërpërgjigjur Glauk Konjufcës së Vetëvendosjes, ku ky i fundit tha se Vjosa Osmani është e ndërtuar për postin e kryetares së Kuvendit.

Beqiri ka thënë se ky propozim është joserioz dhe kjo nuk është fryma e bashkëpunimit.

“Kandidimi i Vjosa Osmanit për postin e kryeministrit është një e drejtë ekskluzive e LDK-së e Këshillit të Përgjithshëm që të përcaktojmë për atë se me kë do t’i fitojmë zgjedhjet”, tha Beqiri./Periskopi/