EKSKLUZIVE: VV sërish në rrezik të përçahet, shkak lëshimet e Albin Kurtit ndaj LDK’së dhe Vjosa Osmanit

Të hënën (dje) nuk kishte kaluar tamam një orë pasiqë Lidhja Demokratike e Kosovës, shpalli kandidaturën e Vjosa Osmanit për kryeministre nga kjo parti, kur në njërin nga hotelet në qendër të Prishtinës, do të mblidheshin krerë të kësaj partie dhe të partisë Vetëvendosje. E përfaqësuar nga Albin Kurti, Glauk Konjufca dhe Bisnik Bislimi, VV në njërën anë dhe LDK’ja në anën tjetër me Vjosa Osmanin, Lutfi Hazirin dhe Isa Mustafën, do të bisedonin se si do t’ia bënin me koalicionin parazgjedhor.

Pas më shumë se një orë sa zgjati takimi, përfaqësues të të dy partive, u larguan nga hoteli megjithëse nuk u deklaruan për media. Por më vonë, mediat do të raportonin se LDK dhe Vetëvendosje, ‘janë marrë vesh që Vjosa Osmani të jetë kandidate për kryeministre’ nga koalicioni LDK – VV, derisa Albin Kurtit do t’i takonte posti i kryeministrit dhe siç raportohej në media edhe posti i ministrit të jashtëm.

Mirëpo, Periskopi merr vesh se Vetëvendosje ka mbajtur një mbledhje sot me Kryesinë e saj, të cilët kanë kundërshtuar këtë ofertë të krerëve të VV’së për LDK’në.

Sipas burimeve të Periskopit, një pjesë e anëtarëve të Kryesisë kanë kërcënuar me dorëheqje, në rast se do të pranohej që kreu i VV’së, Albin Kurti, të ishte i dyti në koalicionin LDK – VV.

“Një pjesë e anëtarëve të Kryesisë së Vetëvendosjes, kanë kundërshtuar kategorikisht një opsion të tillë, që Kurti të mos jetë kandidat për kryeministër si dhe e kanë kërcënuar me dorëheqje nga Kryesia, një pjesë e madhe e tyre”, i kanë thënë burimet Periskopit.

Kujtojmë se pas takimit të djeshëm mes LDK’së dhe Vetëvendosjes, dy partitë kanë ashpërsuar replikat mes vete.

Ka qenë ish-deputetja e kësaj partie, Drita Millaku, e cila i ka thënë Insajderit se ‘edhe po të dëshironte Albin Kurti të heq dorë nga opsioni i kandidatit për kryeministër, Kryesia e VV’së nuk do ta lejonte një gjë të tillë’.

Pas Millakut, do të pasonte edhe reagimi tjetër i ish-deputetes së VV’së, Albulena Haxhiu, e cila përmes një statusi në Facebook, tha se ‘Vetëvendosje e ka kandidatin e duhur’ për kryeministër.

Më i ashpër ndaj opsionit të LDK’së, është treguar ish-deputeti tjetër i VV’së, Xhelal Sveçla, i cili goditi LDK’në, duke thënë se po ‘vepronte tinëzisht përballë ofertës së Vetëvendosjes’.

Sveçla e shtyri që të reagojë përballë deklaratës së tij, edhe Vjosa Osmanin, e cila  tha se ‘akuzat që po ia bën Vetëvendosje LDK-së, tregojnë se nuk janë të sinqertë në bashkëpunim”.

Mbetet misterioze se si kryetari i Vetëvendosjes, Albin Kurti po bën lëshime kaq të mëdha ndaj Lidhjes Demokratike të Kosovës. A është pasiguria për fitore të partisë së tij në zgjedhjet e 6 tetorit apo thjeshtë lakmia që me çdo kusht të jetë pjesë e pushtetit? /Periskopi/