Policia flet për vajzën që u dënua me 100 euro: Ajo ka bërtitur me zë të lartë

Ajo kishte shkruar se po qëndronte ulur në një pushimore në rrugën “Rexhep Luci” në kryeqytet, ku po priste një taksi dhe po bisedonte me një shoqe të saj.

Gashi kishte shkruar se një e qeshur e saj, me zë të lartë, i kishte kushtuar me 100 euro gjobë nga zyrtari policor, Fatmir Miftari.

“Zyrtari policor: Çka po kesh me zë?”

“Aida: A seriozisht po më pyet?”

“Fatmiri: Je tu keshë shumë, mos kesh!

“Aida: Me çka po e matë që po keshi shumë?

“Fatmiri: Me veshtë e mi!”, shkruante Gashi në Facebook.

Për të kuptuar se çka në të vërtet ka ndodhur mbrëmë, Periskopi ka kontaktuar me Policinë e Kosovës.

Në përgjigjen dhënë Periskopit, Policia ka bërë të ditur se zyrtarët policorë kishin pranuar ankesa nga qytetarët për zhurmë në lokalet që operojnë në rrugën “Rexhep Luci”.

Sipas versionit të Policisë, qytetarja Gashi kishte shpërfillur zyrtarët policorë dhe kishte filluar të bërtas me zë.

“Me datën 18 korrik 2019 në rrugën “Rexhep Luci”, pas ankesave të qytetarëve zyrtarët policorë u janë përgjigjur thirrjeve dhe kanë identifikuar të gjitha lokalet dhe hapësirat të cilat bien ndesh me ligjin, pasi që të njëjtat nuk kanë zbatuar kufizimin kohor të paraparë me Ligjin 03/L-142. Në datën e lartpërmendur, zyrtarët policorë kanë hasur në një grup të personave në mesin e të cilëve në shenjë revolte, një person i gjinisë femrore, përpos mospërfilljes së urdhërave të zyrtarëve policorë ka bërtitur me zë të lartë dhe nuk i është bindur urdhërave të zyrtarëve policorë. Si rredhojë e këtyre sjelljeve të cilat bien ndesh me ligjin 03/L-142 për ‘prishjen e rendit dhe qetësisë publike’, të njëjtës i është shqiptuar një kundërvajtje”, thuhet në përgjigjen e Policisë dhënë për Periskopin.

Zyrtarët policor kanë njoftuar edhe për bazën ligjore të dënimit ndaj qytetares Gashi.

“Duke u bazuar në Ligjin për Prishje të Rendit dhe Qetësisë Publike, 03/L-142.

Neni 8 – Bezdisjet Publike– Shkeljet që kanë të bëjnë me zhurmën

1. Kushdo që shkakton zhurmë të pa nevojshme dhe të padurueshme që dëgjohet të banorët për rreth apo në rrugë dhe që shqetësojnë personat tjerë nga ora 22:00 e deri në orën 07:00 gjatë ditëve të javës dhe prej orës 23:00 e deri ne orën 07:00 të shtunave dhe të dielave, dënohet për kundërvajtje.
2. Nëse kundërvajtjet nga paragrafët 1 të këtij neni janë kryer nga personi fizik, ai /ajo dënohet me gjobë prej tridhjetë (30) deri pesëqind (500) Euro.
3. Nëse kundërvajtjet e parapara në paragrafin 1 të këtij neni janë kryer nga pronari ose personi përgjegjës i një subjekti juridik, ai/ajo dënohet me gjobë prej njëqindepesëdhjetë (150) deri shtatëqind (700) Euro”, njofton Policia.

Ata kanë bërë të ditur se vetëm në dy javët e para të muajit korrik, kanë pranuar 65 thirrje nga qytetarët e kësaj zone për prishje të rendit dhe qetësisë.

“Policia e Kosovës pas pranimit të ankesave të qytetarëve për ‘prishje të rendit dhe qetësisë publike’, ka ndërmarrë masa konform autorizimeve policore ndaj zhurmës së lokaleve, për të cilat janë shfaqur pakënaqësi të shumta për shqetësim nga ndotja akustike. Vetëm në dy javët e para të muajit korrik, Stacioni Policor Qendra ka pranuar gjithësej 65 thirrje/ankesa nga qytetarët e zonës Qendër të Prishtinës për prishje të rendit dhe qetësisë publike”, thotë Policia tutje./Artinë Muçiqi/PERISKOPI