Ministria e Jashtme: Serbia s’mund ta ekstradojë Tomor Morinën, ai do të lirohet

Ministria e Punëve të Jashtme i ka thënë Periskopit se Serbia s’mund ta ekstradojë ish-ushtarin e UÇK’së, Tomor Morinën, i cili është arrestuar në Maqedoninë e Veriut. Këshilltari i ministrit Behgjet Pacolli, Jetlir Zyberaj, ka thënë se Morina do të lirohet pas procedurave që pritet të përfundojnë në Maqedoninë e Veriut. Për këtë, ai thotë se autoritetet e Kosovës, janë vazhdimisht në kontakt me autoritetet ne Maqedoninë e Veriut….

Ministria serbe e Drejtësisë i ka dorëzuar Maqedonisë së Veriut kërkesën për ekstradimin e ish-pjesëtarit të UÇK-së, Tomor Morina, i është konfirmuar agjencisë së lajmeve Tanjug nga kjo ministri.

Morina u arrestua javën e shkuar në pikën kufitare Blacë, sipas fletëarrestit nga Interpoli. Ai në Serbi kërkohet nën dyshimet se kreu krime lufte kundër civilëve serbë në Kosovë.

Kryeministri maqedonas, Zoran Zaev ka thënë se në këtë rast do të respektohet ligji, përcjell alsat.

Ndërkohë, Periskopi ka pyetur Ministrinë e Punëve të Jashtme të Kosovës lidhur me këtë rast.

Jetlir Zyberaj, këshilltar i ministrit të jashtëm Behgjet Pacolli, ka thënë se kjo Ministri është në kontakt të vazhdueshëm me autoritetet maqedonase.

“Po ne jemi ne kontakt te vazhdueshëm me autoritetet më të larta maqedonase. Personalisht zëvendëskryeministri Pacolli është i involvuar në këtë rast”, ka thënë Zyberaj në një përgjigje për Periskopin.

Ai tutje ka thënë se ekstradimi i Morinës nuk mund të ndodhë sepse ‘flet – arresti është politik”.

“Ekstradimi nuk mund te ndodhë sepse fletarresti është politik sikurse te gjitha fletarrestet që i ka leshuar Serbia ndaj ish luftëtarëve të UCK-së. z.Morina do të lirohet absolutisht pas procedurave ligjore ngase duhet te pastrohet çështja e sinjalizimit ne sistemin e INTERPOLIT”, ka thënë ai./Periskopi/