Gratë po dhunohen, Haradinaj skandaloz, LDK-ja në përçarje

Para një muaji, një burri e rrëmbeu një vajzë dhe me forcë e futi në veturë. Më pas e dërgoi në një motel në Veternik të Prishtinë, ku e dhunoi seksualisht. Por, kjo iu duk pak. Ai e fotografoi e incizoi viktimë, i vodhi dokumentet personale dhe paratë që i kishte pasur me vete.

Policia e Kosovës njoftoi sot se kishte arritur ta arrestonte personin në fjalë. Dhe ky është lajmi më i mirë i javës.

Por, bash gjatë kësaj jave ndodhën edhe dhunime e ngacmime të tjera seksuale ndaj grave. Njëri u pa në Rrugën B në kryeqytet. Një tjetër e kishte dhunuar dhe filmuar një vajzë në Gjakovë. E kështu me radhë.

Po gjatë kësaj jave, zyra e Unicefit në Kosovë publikoi të dhënat sipas të cilave vetëm 12 për qind e fëmijëve me aftësi të kufizuara shkonin në shkollë. Vetëm 5 mijë e 300 nga 43 mijë të identifikuar si të tillë. Edhe në vendet e pazhvilluara afrikane si Etiopia, Zambia, Mali e në Bangladeshin aziatik, 70 për qind e këtyre fëmijëve merrnin pjesë në shkollim. Por, Kosova i stigmatizon dhe nuk iu krijon kushtet e nevojshme. Ndoshta, kjo është përgjigjja për pyetjen se pse shoqëritë shqiptare e kishin mundësinë të krijonin politikanë aq sensacionalë, aq të korruptuar e kriminalë, dhe një nga bandat mafioze më të fuqishme në Evropë.

Pikërisht gjatë kësaj jave, kryeministri i dorëhequr Ramush Haradinaj bëri një veprim tjetër të papritshëm. Thirri mbledhje të re të Qeverisë së tij të dorëhequr. Duket se u pendua paksa për veprimin e bërë, e për të cilën siç tha, nuk ishte konsultuar me askënd dhe nuk e kishte paralajmëruar askënd. Sensi senzacionalist në veprim! Sërish!

Por, i njëjti bashkë me ish kryetarin e Kuvendit, Jakup Krasniqin, udhëtoi për në Hagë të Holandës. Dhe ai nuk shkoi që të notonte nëpër fontana si avokati Arianit Koci. Ai shkoi për t’u intervistuar në cilësinë e të dyshuarit për krime lufte, ende të paspecifikuara. Ramushi ishte mbrojtur në heshtje. Ashtu edhe Jakup Krasniqi.

Dhe ndërsa Gjykata Speciale sërish u bë kryetemë në debatet e shumta që po zhvillohen në vend, LDK-ja vazhdon përgatitjet për zgjedhjen e kryetarit të ri dhe të kandidatit për kryeministër. Shumë burime thonë që kjo parti në mënyrë që të shmangë përçarjet po përpiqet që të zgjedh konsensualisht emrat për dy pozicionet kryesore në parti. Ndër emrat e përfolur për kryetar të partisë janë Kujtim Shala, Vjosa Osmani dhe Isa Mustafa. Për kryeministër ndërkohë, më i përfoluri është Avdullah Hoti. Por, dy emra që duket se nuk do të marrin mundësinë për të fituar zgjedhjet e brendshme janë Lutfi Haziri dhe Agim Veliu. Gjatë kësaj jave, të dy patën takime rastësore e interesante. I pari u takua me Dardan Molliqajn ndërsa i dyti me Sami Lushtakun.

Java që vjen pritet të jetë shumë më e nxehtë!