Ende asnjë dorëheqje nga ministrat e zv/ministrat e AAK’së

Në mënyrë krejtësisht të papritur, kryeministri Ramush Haradinaj dha dorëheqje të parevokueshme dje.

Arsye për këtë ishte ftesa që ai thotë se ka marrë nga Gjykata Speciale për intervistim, në cilësinë e të dyshuarit.

Ky vendim i Haradinaj, përveç të tjerëve, në befasi i zuri edhe vetë ministrat e partisë së tij. Të paktën, kështu i ka thënë Periskopit, ministri i Mbrojtjes nga radhët e kësaj partie, Rrustem Berisha.

Ai është zënë aq në befasi, saqë kur u pyet se si do të veprojnë tani ata si ministra, dha përgjigje të paqartë.

Ndonëse u prit një vendim i tillë dje, asnjëri nga këta dy ministra – Pal Lekaj, ministër i Infrastrukturës dhe Rrustem Berisha, ministër i Mbrojtjes – nuk bënë zë.

Lidhur me këtë çështje, Berisha teksa ka folur për Periskopin, ka thënë se do të presin procedurat tutje, pasi aktualisht janë në mbështetje të plotë të kryeministrit Haradinaj.

Ai tha se gjatë ditës së djeshme, në mbledhjen e partisë, nuk është diskutuar nëse ai dhe Lekaj, si ministra nga kjo parti, duhet të dorëhiqen.

“Edhe ne do t’i presim procedurat tjera, njëherë jemi në mbështetje të kryeministrit Haradinaj…jo jo nuk është diskutuar nëse ne si ministra të AAK’së do të dorëhiqemi. Nuk e di pse s’është diskutuar. Dje është diskutuar vetëm rasti i Haradinajt, nuk kemi pasur rast të diskutojmë rastin e ministrave të AAK’së…nuk e di si do të veprojmë”, ka thënë Berisha për Periskopin.

Teksa ka folur për dorëheqjen e Haradinajt dhe ftesën nga Specialja, Berisha ka thënë se ka qenë një situatë shumë e vështirë për ta.

“Unë mendoj se realisht ka qenë një situatë e vështirë edhe për të edhe për neve, sepse kemi punuar bashkë kohë të gjatë. Atij i ka ra shumë me u ballafaqu me këto padrejtësi por megjithatë do të përfundojë mirë edhe kjo, pasi ne besojmë në pafajësinë e tij, por është vështirë…në mbledhje të Qeverisë e kam marrë vesh edhe unë. S’kam pasur njohuri më herët”, ka thënë Berisha për Periskopin.

Për ta pyetur se si do të veprojë pas dorëheqjes së Haradinajt, Periskopi ka kontaktuar edhe ministrin tjetër të kësaj partie, Pal Lekajt.

Ai nuk është përgjigjur në asnjërën nga dhjetëra thirrje telefonike që ia janë bërë nga redaksia.

Në Qeverinë e tij, Haradinaj kishte vetëm dy ministra nga partia. Dhe, te dy me aktakuza në fuqi. Lekaj për keqpërdorim detyre për çështje të subvencioneve sa ishte kryetar i Komunës së Gjakovës, e Berisha si i akuzuar në rastin për listat e veteranëve.

Me të dhënë dorëheqje, Haradinaj i bëri thirrje presidentit Hashim Thaçi që t’i shpall menjëherë zgjedhjet e parakohshme. Mandatin e kryeministrit, Haradinaj tha se ia ktheu popullit.

Por, çka parashihet tash të ndodh?

Situata të tilla i parasheh Kushtetuta, e cila ofron zgjidhjen për dalje nga kjo situatë.

“Nëse kryeministri jep dorëheqjen ose për arsye të tjera, posti i tij/saj mbetet i lirë, Qeveria bie, dhe presidenti i Republikës së Kosovës, në konsultim me partitë politike ose koalicionin që ka fituar shumicën në Kuvend, mandaton kandidatin e ri, për të formuar Qeverinë”, thuhet në paragrafin e pestë të nenit 95.  

Mbështetur në dokumentacionin e deponuar në Komisionin Qendror të Zgjedhjeve, përfaqësues i koalicionit PDK-AAK-Nisma është kryeparlamentari Kadri Veseli. Pikërisht nga ai presidenti Thaçi do të mundë ta kërkojë emrin e mandatarit për ta formuar Qeverinë e re.

Por, edhe sikur AAK-ja e Haradinajt të mos ishte për zgjedhje të reja, koalicioni nuk do të mundë ta bënte Qeverinë e re. Kjo për shkak se Kushtetuta kërkon që kandidati për kryeministër, jo më vonë se 15 ditë pas emërimit, paraqet përbërjen e Qeverisë para Kuvendit dhe kërkon miratimin nga ana e Kuvendit, dhe se Qeveria konsiderohet e zgjedhur vetëm në rast se merr shumicën e votave të të gjithë deputetëve të Kuvendit.

Qeveria Haradinaj kishte marrë besimin pikërisht nga minimumi kushtetues i votave të deputetëve. Pro saj ishin vetëm 61 nga 120 ligjvënës, sa ka Kuvendi. Vetëm pak muaj kishte ruajtur këto vota dhe prej më shumë se një viti e gjysmë Qeveria funksionon pa e pasur shumicën e deputetëve. Në këtë rrethanë, koalicioni e ka të pamundur zgjedhjen e Qeverisë së re.

Haradinaj ka publikuar vendimin për dorëheqje, por ka thënë se tek të hënën nëpërmjet shkresave zyrtarisht do t’i informojë përfaqësuesit institucionalë dhe partnerët e koalicionit. Po kështu, edhe që t’i kërkojë kreut të shtetit që t’i shpallë zgjedhjet e reja.

Tani, kompetenca kushtetuese e presidentit është vetëm të kërkojë propozimin për mandatarin e ri./PERISKOPI