Sqaron kryeprokurori: Ishte keqkuptim, zhytësi Ismail Kasumi s’është i dyshuar për rrahje të gruas

Mëngjesin e sotëm, u.d i kryeprokurorit Kujtim Munishi dhe prokurori kujdestar i cituar me leje të tij, Ali Ajdini, kanë lëshuar një informacion të pasaktë për zhytësin e njohur kosovar Ismail Kasumi.

Pas daljes së këtij informacioni kryeprokurori Munishi ka kontaktuar Express, ku sqaron se në rrahje është përfshirë një person që ka emrin dhe mbiemrin e njëjtë me të zhytësit.

Munishi thekson se kjo situatë është keqkuptuar dhe është e paqëllimshme.

Prokuroria ka gjetur se bëhet fjalë për një person tjetër (që ka emrin e mbiemrin e njëjtë me të zhytësit) por  jo për zhytësin e vërtetë, Ismail Kasumin.

Kryeprokurori thotë se nuk ka pasur dijeni për rastin dhe se prokurori kujdestar është marrë me këtë rast.

“Unë nuk ia përmend atij (prokurorit) zhytësin . Unë ia përmenda me emër dhe mbiemër. Ai ishte një person i tretë krejt. Unë absolutisht e dija njëjtë sikur ti. Se unë me emër dhe mbiemër. Edhe prokurori ma konfirmoi me emër e mbiemër…Unë duke mos e ditë situatën se prokurori kujdestar është marrë me atë.

Kryeprokurori Munishi edhe njëherë thekson se gjithçka ka qenë e paqëllimshme.

“Unë e pyeta me emër dhe mbiemër. Ai më tha po e kemi pranu. Nuk na ka ndodhë as neve. Po është bërë një keqkuptim. Ka qenë pa asnjë qëllim”, tha Munishi.

Ndërkohë, zhytësi Ismail Kasumi është shprehur se nuk dëshiron që të diskutojë lidhur me këtë informacion të pasaktë dhe se me lëndën tashmë do të merret gjykata.

“Nuk kam se çka te them. Do të merret Gjykata”, ka thënë Kasumi.