“Mbreti i Kokainës së Milanos” arratiset në mënyrë spektakulare nga burgu

Mafioz italiani i njohur edhe si “mbreti i Kokainës në Milan” ka ikur nga burgu në Uruguay ku po priste ekstradimin e tij për në Itali, ka njoftuar së fundi ministri i punëve të brendshme të vendit amerikano-jugor.

Rocco Morabito, 53 vjeçar, lideri i grupit të organizuar më të fuqishëm kriminal italian “Ndrangheta” – iku nga ky burg që ndodhej në kryeqytetin e Uruguajit, Montevideo, përmes një vrime që ndodhej në çatinë e ndërtesës.

Edhe tre të burgosur të tjerë që po e prisnin ekstradimin për në Brazil e Argjentinë respektivisht ia dolën të arratiseshin bashkë me të.

Të katër burrat kishin lëvizur me një litar nga burgu drejt një shtëpie në afërsi ku e kishin grabitur edhe pronarin, tha ministri.

Ndërtesa e burgut në Montevideo

Morabito ka qenë në arrati për 23 vjet por u arrestua në shtatorin e vitit 2017 në një hotel luksoz në Montevideo, bashkë me gruan e tij.

Gangsteri që është dënuar në mungesë me 30 vjet heqje lirie në Itali, ka qenë në ndjekje nga viti 1994 pasi kishte provuar të fuste në vendin e tij gati 1 ton kokainë nga Brazili.

“Është e papranueshme që një kriminel si Morabito ka arritur të arratiset nga burgu në Uruguaj ndërsa priste ekstradimin për në Itali,” tha ministri i brendshëm i Italisë, Matteo Salvini. “Do të kërkoj shpjegime të menjëhershme nga qeveria në Montevideo dhe do ta ndjekim Morabiton, kudo që është.” /Periskopi