”Drejtësia në Kosovë pa guxim për të gjykuar krimin në profilin e lartë”

Ai thotë se për shkak të presionit të lartë institucionet e drejtësisë në Kosovë kanë tentuar të krijojnë mekanizma se kinse po e luftojnë korrupsionin dhe krimin e organizuar dhe kjo, sipas tij, është bërë për të mashtruar qytetarët e Kosovës dhe ndërkombëtarët.

“Nevoja për me dëshmu rezultate ndaj korrupsionit kanë lindur pas kërkesave nga ndërkombëtarët. Duke qenë nën presion institucionet kosovare janë detyruar të krijojnë mekanizma për të thënë se po e luftojmë krimin e organizuar”, ka thënë Musliu në “Express Intervistën” në KTV.

Sipas Musliut është vet Këshilli Prokurorial, përmes Reshat Millakut, që ka shkelë kriteret e saj në shënjestrimin e rasteve, duke i ndjekur vetëm ato të profilit të ulët dhe të mesëm.

“Shënjestrimi i këtyre rasteve është bërë për të rritur numrin e rasteve e për të bërë një mashtrim se kinse po luftohet krimi i organizuar e korrupsioni. Nëse shohim rastet e shënjestruara atëherë mund ta shohim se kjo është mashtrim”, ka thënë Musliu.

Ai thotë se janë shënjestruar vetëm rastet e profilit të ulët dhe të mesëm, derisa rastet e profilit të lartë përmes së cilës ka potencial për konfiskim të pasurisë, sipas tij, nuk është bërë asgjë.

“Kryesisht janë shënjestruar raste të profilit të mesëm dhe të ulët, por ndaj profilit të lartë duket se nuk ka as guxim të shënjestrohen”, thotë Musliu, gjersa përmend rastet profilit të lartë që nuk janë shënjestruar si ai i mashtrimit me viza të Ukë Rugovës, rasti “Toka” ku është i përfshirë Azem Syla, rasti ndaj Qemajl Mustafës, rasti “Pronto”, dhe ai ndaj Pal Lekajt.

Ai thotë se sistemi i drejtësisë është i ndikuar nga politika, dhe nuk janë ato raste që futen në procedurë dhe marrin dënimin e merituar.

“Janë 51 raste që janë shënjestruar, e prej tyre 15 janë të përfunduara në formën e prerë. Dënimet janë qesharake. Janë një numër i vogël i rasteve kur janë dënuar me burgim efektiv, por që i përkasin profilit të ulët”, u shpreh ai.

Ai shpreh bindjen se baza ligjore është e jashtëzakonshme, por nuk po punohet në implementimin e saj.

“Këta prokurorë nuk kanë bërë asnjëherë kërkesë për konfiskim të pasurisë. Në masë të madhe këta prokurorë kanë qenë të ndikuar në aktakuzat që kanë ngritur. Është përdorë pushteti që t’i ndjekin kundërshtarët e tyre brenda sistemit të drejtësisë, që shërben për të bërë përndjekje të individëve. Përfaqësimi i këtyre aktakuzave nuk është asnjëherë i denjë”, u shpreh ai.

Sipas tij nëse vazhdon të jetë ky nivel që e kemi sot atëherë nuk do të ketë investime ndërkombëtare për shkak të mos sigurisë, e as vet qytetarët nuk janë të sigurt në punët e tyre për shkak të problemeve juridike që ekzistojnë.

“Në rastet kur një prokuror e zhvillon një proces hetimor, ai i ka në dispozicion të gjitha institucionet, i cili me një kërkesë në gjykatë ai mund të hyjë shumë thellë dhe ai mund të arrijë të dëshmojë për pasurinë e përfituar nga një aktiviteti kriminal dhe me këto dyshime mund të bëjë një aktakuzë përmes së cilës duhet të kërkojë konfiskimin e pasurisë. Gjykata duhet ta vërtetojë se nëse ajo pasuri është e fituar me vepër penale atëherë ajo duhet të konfiskohet. Momentalisht një armë e fort e ka Gjykata, që mund t’i kërkojë personit të dyshuar që të sjellë të gjitha dëshmitë që i posedon se si e ka bërë pasurinë ligjërisht dhe nëse nuk dëshmohet atëherë i konfiskohet pasuria”, u shpreh Musliu.

Megjithatë, Musliu thotë se në raport me vendet e rajonit Kosova nuk qëndron më keq.

“As Serbia, Mali i Zi, Shqipëria e Maqedonia e Veriut nuk qëndrojnë më mirë se ne”, tha ai.

Tutje Musliu ka thënë se, “ky sistem i drejtësisë në të cilin është investuar jashtëzakonisht shumë, vazhdon të mos na shpaguhet. Ata janë duke na e kthyer vetëm me të keq dhe po u shërbejnë vetëm gjepave të vet dhe interesave partiake”.