Dalai Lama qorton Donald Trumpin për parime morale

Dalai Lama ka thënë se Donald Trumpi ka mungesë të parimeve morale. Më tej ai ka thënë se është i hapur që lideri i ardhshëm shpirtëror i budistëve tibetianë të jetë një grua, por e cila duhet të jetë “atraktive”.

Në një intervistë për BBC-në, Dalai Lama po ashtu tha se ndërsa e përkrahte BE-në dhe mendonte që do të ishte më mirë për Britaninë të mbetej pjesë e saj, nuk donte që Evropa të bëhej “myslimane” apo “afrikane”.

I pyetur për presidentin amerikan, ai tha: “Një ditë thotë diçka, ditën tjetër diçka tjetër. Mendoj se ka një mungesë parimesh morale. Kur u bë president, ai tha se Amerika do të ishte e para. Kjo është gabim. Amerika e ka për obligim të marrë përgjegjësinë globale.”

Sa i përket BE-së, qëndrimi i tij ishte më pragmatik, duke thënë se vendet evropiane duhej të pranonin refugjatë e t’i edukonin e trajnonin ata, por qëllimi final duhej të ishte në kthimin e tyre në shtëpi.

Dalai Lama ka qenë në ekzil prej vitit 1959 por tha se nuk i ka humbur shpresat për t’u kthyer në Tibet sërish. /Periskopi