Daçiq: Nuk quhet kompromis njohja e Kosovës nga Serbia, s’mund ta kërkoni një gjë të tillë

Ministri i jashtëm serb, Ivica Daçiq ka thënë se ‘kompromisi me Kosovën nuk nënkupton që Serbia duhet ta njohë pavarësinë e saj’.

“Tani për ne është kruciale që të gjejmë një kompromis, i cili nuk mund t’i imponohet vetëm Serbisë, nuk mund t’i thuhet Serbisë se vetëm duhet ta njohësh Kosovën me territorin e saj, kynuk është kompromis”, ka thënë Daçiq, raportojnë mediat serbe, përcjell Periskopi.

Ministri i jashtëm serb ka thënë se ‘nuk është Serbia ajo e cila po vendos kushte për vazhdimiin e dialogut’, duke shtuar se ‘kanë qenë hapat që ka ndërmarrë Kosova që kanë pamundësuar vazhdimin e tij’.

Ai ka thënë po ashtu se nuk është e vërtetë që Shtetet e Bashkuara janë të involvuara në dialogun mes Prishtinës dhe Beogradin të kryesuar nga Bashkimi Evropian.

“Deri më tani, nuk kemi asnjë shenjë se ka ndryshuar formati i dialogut ose se shtete të tjera janë përfshirë në të. Do të ishte shumë e vështirë që SHBA të përfshihej në të, do të ishte shumë joreale’, ka thënë Daçiq. /Periskopi/