Vuçiq sërish ia kthen Thaçit, pasi ky i tha se nuk mund ta nisë ushtrinë për në Kosovë

Presidenti serb Aleksandar Vuçiq deklaroi sot se forcat speciale të Kosovës filluan të tërhiqen nga veriu i Kosovës.

Ai tha në Parlamentin serb se çështja kryesore që çoi në tërheqje ishte reagimi i bashkësisë ndërkombëtare, i cili tha se kishte pasur një tejkalim të përdorimit të forcës.

“Sipas informacionit që kemi, vetëm katër makina të tyre janë në veri të Kosovës dhe po tërhiqen. Ky është një lajm i mirë për ruajtjen e paqes dhe stabilitetit, dhe për qytetarët tanë në Kosovë”, tha Vuçiq.

Ai vuri në dukje se plani i forcave të Kosovës ishte arrestimi i 26 personave dhe se 19 prej tyre nga veriu i Kosovës u dërguan në pjesën jugore të Mitrovicës së Kosovës. Vuçiq beson se provokimet do të vazhdojnë.

“Hashim Thaçi ka thënë se e di se nuk mund të shkojmë në Kosovë, pasi atje NATO pret dhe e di sa e vështirë është situata për ne. Dhe jam shumë i lumtur kur Thaçi është i qetë dhe i sigurt se i di të gjitha mirë dhe të gjitha i kupton mirë “tha Vuçiq.

Presidenti i Kosovës Hashim Thaci ka thënë se “Serbisë nuk do t’ia mbërrijë ymri të kthehet në Kosovë”.

Kjo erdhi si përgjigje ndaj deklarimeve të presidentit serb Aleksandër Vuçiq , i cili dje ka thënë se “Hashim Thaçit nuk do t’ia mbërrij ymri të vendosë pikën kufitare në Kopaonik”.

Në konferencën për gazetarë ku Thaçi ka folur për aksionin e Policisë së Kosovës në veri, ndër të tjera tha se sa më shumë që vonohet Bashkimi Evropian me liberalizim të vizave, aq më shumë rritet interesimi i Kosovës dhe Shqipërisë për heqje të pikave kufitare.

I pyetur për deklarimet e presidentit të Serbisë i cili për idenë e bashkimit kombëtar, ka thënë se “Hashim Thaçit nuk do t’ia mbërrij ymri të vendosë pikën kufitare në Kopaonik”, presidenti Thaçi tha se njësoj ka menduar Serbia edhe kur është bërë fjalë për çlirimin e Kosovës apo pavarësinë e saj.

“Serbia dhe Vuçiq kanë menduar edhe më herët që nuk ka me na mbërri ymri kurrë me qenë të lirë dhe të pavarur, por ja që jemi të lirë dhe të pavarur,  dhe nuk kemi Serbi në Kosovë, dhe nuk do t’ia  mbërrij kurrë ymri Serbisë të kthehet në Kosovë. Ndërsa e theksoi që sa më tepër po vonohet Bashkimi Evropian në raport me Kosovën për liberalizim vizave dhe agjendën tjetër, aq më tepër po rritet angazhimi dhe përkushtimi, por edhe vullneti i të gjithëve për një angazhim të përbashkët të institucioneve të Kosovës dhe Shqipërisë të respektohet vullneti i qytetarëve të dy vendeve që të ndodh bashkimi kombëtar, pra Kosova dhe Shqipëria të jetojnë në një shtet të përbashkët nën ombrellën euroatlantike, gjithmonë duke përfshi Preshevën, Medvegjën dhe Bujanocin, në Republikën e Kosovës”, tha Thaçi.