Thaçi: Do ta marrim Luginën e Preshevës, pa dhënë asnjë centimetër territor – as Trepçën, as Ujmanin, as Mitrovicën

Thaçi nga Hasi ka thënë se nuk do të preket as Trepça, as Ujmani e as Mitrovica.

Bashkimi i Luginës së Preshevës, sipas tij, do t’i paraprijë bashkimit kombëtar edhe me Shqipërinë.

“Kombi shqiptar ku do që jeton kurrë nuk ka qenë më mirë, më i organizuar. Presheva, Medvegja dhe Bujanovci t’i bashkëngjiten Kosovës pa iu cenuar asnjë centimetër e territorit të Kosovës. As Trepça, as Ujmani, as Mitrovica, gjë që do t’i paraprijë bashkimit kombëtar me Shqipërinë. Sepse misioni vetëm me lirinë dhe pavarësinë e Kosovës është i pamjaftueshëm, ne jemi ndarë padrejtësisht dhe duhet të bashkohemi me vullnetin tonë”, ka thënë Thaçi.

Ndryshe, presidenti shkoi sot në Has, pasi u nderua me titullin “Qytetar Nderi” nga Bashkia e Hasit në Shqipëri.

Titulli “Qytetar Nderi” iu nda me motivacionin për kontributin në çlirimin e trojeve shqiptare.

Me këtë rast, Thaçi tha se ky nderim është moment i veçantë në jetën e tij.

Ai tha se çlirimi i Kosovës është meritë e të gjithë shqiptarëve.

“Për mua është një moment i veçantë në jetën time sepse kur mendoj se ku ishim para 20 vitesh dhe ku jemi sot mund të them lirisht se Kosova, shqiptarët të pamundurën e bën të munguar. Çlirimi i Kosovës është meritë e çdo qytetari të Kosovës është meritë e gjithë njerëzve të Shqipërisë është meritë e gjithë shqiptarëve ku di që jetojnë. Secili duhet të ndihet krenar në kontributin për lirin e Kosovës”, tha Thaçi./PERISKOPI