Surroi: Në themelet e pushtetetarëve të sotëm janë vrasja e civilëve serbë dhe romë

Publicisti dhe gazetari Veton Surroi, është skeptik lidhur me themelimin e Tribunalit Ndërkombëtar për krimet e Serbisë në Kosovë.

Në një shkrim autorial të publikuar në ‘Koha’, me titull “Mos luani me Ferdonije Qerkezin”, Surroi thotë se ‘askush nuk do ta themelojë dhe nuk do të mundet ta themelojë një Tribunal në tillë’.

Ai thotë se ‘pas dështimit të këtij Tribunali, faji do t’i lihet bashkësisë ndërkombëtare dhe do të vazhdohet me skandalet dhe pushtetin që ka bazë padrejtësinë”.

Në njërin nga paragrafet e shkrimit, të cilin, të plotë mund ta lexoni në ‘Koha’, Surroi godet inicuesit e këtij Tribunali – njëherit gjithë udhëheqësit politikë në Kosovë që vijnë nga UÇK’ja, duke thënë se ‘në themelin e pushtetit të tyre qëndron vrasja e civilëve serbë dhe romë” si ‘dhe kundërshtarëve politikë shqiptarë”.

“Në themelet e pushtetit tuaj janë vrasja e civilëve serbë e romë dhe e kundërshtarëve politikë shqiptarë, vjedhja e uzurpimi i çdo gjëje që është publike dhe çdo gjëje private që është e mundur të gllabërohet me kërcënim e dhunë. Në themelet e pushtetit tuaj është vjedhja industriale e votave dhe shteti i kapur. Në themelet e pushtetit tuaj është shkatërrimi i arsimit dhe shëndetësisë, është sundimi i shtresës më injorante të shoqërisë, është degradimi i shprehjes bazike kulturore, deri te gjuha amtare, në nivelin ofendues të primitivizmit. Në themelet e pushtetit tuaj është besimi se çdo gjë shitet dhe blihet: vota, historia, statusi shoqëror, shteti, tërësia tokësore e vendit. Në themelet e pushtetit tuaj është besimi se nuk ka nevojë për sundim të ligjit, ka nevojë për sundim tuajin”, shkruan Surroi në këtë shkrim./Periskopi/