Surroi: Ndërkombëtarët kanë nisur të neveriten me çka po shohin në Kosovë

Në një kolumnë të botuar dje në portalin Koha, publicistja Flaka Surroi ka reaguar për rastin e Fajdeve që ishte aktual në opinion javën e kaluar.

Zonja Surroi e quan gjithë vendin “Republikë të Fajdeve” me arsyetimin si vijon:

“Vetë udhëheqja e këtij shteti nga kumandantat është fajde sui generis: për luftën që e kanë bërë (e disa që thonë se e kanë bërë) populli ka hyrë në borxh te ta, me shpresën se pas tre a katër vjetësh ky borxh të jetë larë. Por jo, kamata e përcaktuar ka qenë aq e lartë, saqë janë kërkuar edhe katër vjet, e kamata mbi kamatë e ka shkaktuar ardhjen edhe të atij katërvjetëshit tjetër, dhe kështu deri në ditët e sotme.”

Surroi shpreh indinjatën e saj me gjyqësinë në vend se si lejoi që provat për rastin e Fajdeve të mos rezultonin për shtatë vjet në ndonjë aktakuzë, siç ndodhi së fundi.

Në një pjesë të tekstit ajo deklaron se njeh edhe vetë raste kur si pasojë e fajdeve, njerëz të caktuar kanë humbur madje edhe shtëpinë.

Lexojeni të plotë shkrimin e saj duke klikuar këtu.