Shtohen patrullat policore në shkolla

Përveç hartimit të planit për kontroll rutinore të nxënësve nga drejtorët e shkollave, Ministri i Arsimit dhe ai i Brendshëm, të martën diskutuan edhe për shtimin e patrullave policore nëpër shkolla.

Ministri i Arsimit, Shkencës dhe Teknologjisë, Shyqiri Bytyqi, në kuadër të angazhimeve për gjetjen e një zgjidhjeje për shtimin e sigurisë në shkolla stoi në takim ministrin e Brendshëm, Ekrem Mustafa, me të cilin janë pajtuar që pas përfundimit të vitit shkollor të krijohet Task Forca për parandalimin e përdorimit të narkotikëve dhe shtimin e sigurisë në shkolla.

Pas diskutimeve në lidhje me aktet e dhunës në shkolla, të raportuara kohëve të fundit, Bytyqi ka kërkuar bashkëpunimin e Policisë së Kosovës dhe Kolegjiumit të DKA-ve me të cilët edhe janë arritur konkluzione, të cilat do të çojnë drejt një zgjidhjeje të përshtatshme për eliminimin e kësaj dukurie.

Të pranishmit në këtë takim kanë ardhur në përfundim që, zgjidhje afatshkurtër deri në përfundim të vitit shkollor, të jetë shtimi patrullave policore në shkolla dhe hartimi i planit për kontroll rutinore të nxënësve nga drejtorët e shkollave, për të cilin plan policia duhet të njoftohet përmes DKA-ve.

Në këtë takim, ministri Bytyqi po ashtu ka ftuar Drejtoritë Komunale të Arsimit që të kërkojnë nga drejtorët e shkollave të mbajnë mbledhje urgjente me prindër, për të diskutuar sigurinë në shkolla dhe planet për ta përmirësuar atë.