Shitësit ilegalë kthehen në sheshet e Prishtinës, ata u larguan një ditë më parë

Inspektorët komunalë të shtunën kanë ndërmarrë aksion për t’i larguar shitësit ambulantë që shesin gjësende të ndryshme në sheshet e kryeqytetit, raporton KTV.

Shitësit, të cilët nuk kanë dashur të flasin para kamerës, kanë thënë se nuk kanë nga ta sigurojnë mbijetesën ndryshe dhe se kjo është mënyra e vetme.

Edhe qytetarët e kanë mirëpritur këtë veprim të komunës, por që janë shprehur se duhet të interesohen për ekzistencën e tyre, jo vetëm t’i largojnë.

E, drejtori i Inspeksionit në Komunën e Prishtinës, Adonis Tahiri, në një përgjigje me shkrim, ka thënë se ka ekipe të inspektorëve që janë çdo ditë në shesh, për të mos lejuar të kthehen sërish shitësit.

“Ne e kemi një ekip, çdo ditë, që kujdestaron në shesh. Të shtunën në mesditë kanë dalë disa shitës ambulantë, malli i të cilëve është konfiskuar. Sa herë që përsëriten rastet e tilla, inspektorët janë aty për të reaguar”, ka thënë Tahiri.

Tahiri ka bërë të ditur se një ndër prioritetet në mandatin tij, do të jetë largimi i shitësve ilegalë dhe largimi i taksive ilegale që janë në kryeqytet.