Momenti kur Bërnabiq para shefit të BE’së tha se kosovarët janë njerëz të malit e terroristë (Video)

Bërnabiq ka thënë se e frikëson fakti që ka punë me, siç i ka quajtur ajo, llojin më të keq të populistëve.

Në video, ajo dëgjohet teksa thotë se frikësohet nga fakti se nuk ka një reagim më të fuqishëm të bashkësisë ndërkombëtare.

“Ajo që mua më së shumti më frikëson, është fakti se keni punë me llojin më të keq të populistëve, me njerëz të cilët vërtet kanë dalë nga mali. Disa prej tyre janë terroristë që nuk janë dënuar. Kanë qenë të akuzuar në Tribunalin e Hagës. Nuk janë dënuar vetëm për faktin se gjatë atij procesi janë vrarë të gjithë dëshmitarët. Si mund ta dimë ne, çfarë mund të bëjnë ata nesër? Për ata është gjithçka e njëjtë, a ka aty luftë apo jo edhe kjo mua më frikëson. Kjo është ajo që mua tmerrësisht më frikëson. Më frikëson që nuk ka një reagim më të fuqishëm të bashkësisë ndërkombëtare”, ka thënë Bërnabiq.

Reagime të shumta në Kosovë u ngjallen pas kësaj deklarate të Bërnabiqit.

Ishte ministri i Punëve të Jashtme të Kosovës, Behgjet Pacolli, i cili në një publikim në rrjetin social “Facebook” kërkoi reagim nga bashkësia ndërkombëtare, derisa tha se sa të jetë ai ministër, Bërnabiq nuk do të hyjë asnjëherë në Kosovë.

“I pështirë dhe krejtësisht të papranueshme komentet e Kryeministres serbe Ana Brnanic në prani të shefit të Delegacionit të BE-së në Serbi Sem Fabrizi ndaj Kosovës “që kemi të bëjmë me njerëzit që vijnë nga mali”. Ky racizëm i institucionalizuar në Serbi, që ka brumin në ideologjinë ultranacionaliste të sëmurë që promovon Qeveria e Ana Brnabicit. Shpresoj që Evropa sot të kuptojë se me çfarë lloj njerëzish kemi të bëjmë, me ata që kanë mbështetur vrasjet masive dhe mohojnë krimet e luftës të kryera nga Beogradi në ish-Jugosllavi. E them me përgjegjësi që sa të jem unë ministër i jashtëm i Republikës së Kosovës, nuk do të lejojë që Kryeministrja serbe të hyjë në Kosovë, për sa kohë që ajo të ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu”, ka shkruar Pacolli në Facebook.

Për këtë reagoi edhe presidenti Hashim Thaçi.

Edhe ai kërkoi reagim ndërkombëtar.

Thaçi, tha për Radion Evropa e Lirë se gjuha e përdorur nga kryeministrja e Serbisë, Ana Bërnabiq, është “edhe një tjetër dëshmi e urrejtjes patologjike të regjimit aktual të Serbisë kundër qytetarëve të Kosovës”.

Komentet e Thaçit vijnë një ditë pasi Bërnabiq, në prani të ambasadorit të Bashkimit Evropian në Serbi, Sem Fabrizi, tha se shqiptarët janë “njerëz që vërtet kanë dalë prej malit”.

Thaçi kërkoi nga Bashkimi Evropian që sa më shpejt ta dënojë dhe të distancohet nga kjo “gjuhë raciste” e zyrtarëve të Serbisë, e cila, sipas tij, nxit urrejtje dhe i minon përpjekjet për pajtim dhe normalizim.

“Ky veprim nuk paraqet asgjë të re dhe të jashtëzakonshme për ne, sepse ne e dimë shumë mirë karakterin gjenocidial të Serbisë së djeshme dhe asaj të sotme”, tha Thaçi.

“Por, i jashtëzakonshëm dhe zhgënjyes për ne është vetëm fakti i hidhur që BE-ja nuk e dënon këtë sjellje raciste dhe antievropiane të Serbisë. Përkundrazi, BE-ja vazhdon t’i mbajë dyert e hapura për një shtet që ka kryer gjenocid dhe që nuk beson në vlerat evropiane as sot”, tha Thaçi./PERISKOPI