Milaim Zeka: Kurrfarë krimi nuk ka bërë Blerim Devolli

Deputeti Milaim Zeka ka thënë se Blerim Devolli mund të dënohet me 400 milionë euro për falsifikim të dokumenteve.

Ai mbështeti iniciativën e Albulena Haxhiu për seancë të jashtëzakonshme, duke thënë se po të kishte sistem të drejtësisë të mirëfilltë, Devolli mund të dënohet për falsifikim të dokumenteve.

Sipas tij, krimin e vërtetë nuk është duke e bërë Blerim Devolli.

“Kurrfarë krimi nuk ka bërë dhe nuk është duke bërë Blerim Devolli, krim kanë bërë dhe janë duke bërë ata që ia kanë dhënë çelësin e derës Postë Telekomit të Kosovës, Blerim Devollit. Deputeti Haxhiu (Bekim Haxhiu), tha që ka vula që nuk janë njësoj, kjo flet se çfarë prokurorie ka Republika e Kosovës. Në mënyrë hipotetike po ia japim 26 milionë Blerim Devollit, po a nuk kemi ne shtet e prokurori dhe gjykatë që mundet me dënuar Blerim Devollin 400 milionë euro a? Për falsifikime, për anekse, për ata që e kanë nënshkruar këtë marrëveshje, duke filluar prej Adnan Merovcit e deri te Shyqeri Haxha, që ia kisha dhënë nga 40 vjet burg për nënshkrimin. E pastaj, kur ishin ata në qeli, kishin tregua kush iu ka thënë prej politikanëve me nënshkruar atë marrëveshje”, tha Zeka.