Haradinaj: Me Macronin kam folur në gjuhën frënge, ata që thonë se më bëri presion, nuk e dinë këtë gjuhë hiç (Video)

Kryeministri Ramush Haradinaj vlerëson se raportet mes Kosovës dhe Amerikës, janë më të mirat ndonjëherë që prej shumë kohësh. I pyetur nga gazetarët lidhur me deklarimet se ka pasur presion në Berlin nga presidenti francez Macron, Haradinaj tha se kjo nuk është e vërtetë. Tha se ka folur me të në gjuhën frënge dhe ata që po flasin për këtë takim, ‘nuk e kuptojnë gjuhën frënge”.

“Asnjëherë marrëdhënie më të mira mes Kosovës dhe Amerikës nuk kanë qenë, në të gjitha fushat. Gjenerali Orr është një mik i Kosovës, qe tetë vjet bashkëpunim me FSK’në dhe fushat tjera”, ka thënë Haradinaj, përcjell Periskopi.

Ai ka thënë se ideja e kufijve ka vdekur.

“Ideja e kufijve, e Vuçiqit e Daçiqit e tjerëve është qe një shekull, qe një shekull gatuajnë në kuzhina të veta ide për ndarjen e tokës së shqiptarëve. Është një brez tjetër, do të varrosen keq politikisht krejt ata që shkojnë rrugës së kufijve”, tha Haradinaj.

Sa u përket deklarimeve se ka pasur presion në Berlin nga kancelarja Merkel dhe presidenti Macron, Haradinaj tha se kjo nuk është e vërtetë.

“Edhe unë i kam pa do prononcime mediatike, ata po folin ata që kanë folë korridoreve. Ma s’pari kam folë në gjuhën frënge me presidentin Macron, ata që po folin a e dinë gjuhën frëngë. Kam kalu shumë mirë me kancelaren Merkel dhe presidentin Macron, ata që flasin se dinë gjuhën frënge, janë nervoz, e di pse janë nervoz po s’kam cka ju baj”, ka thënë ai./Periskopi/