Festimi i Ditës së Evropës: Kosova e vetmja që feston, dhe e vetmja që u izolua nga BE-ja

Uh! Evropë, ti kurva e motit!

Që i re mohit, besës së Zotit!

Po, á ky asht sheji i qytetnisë?

Me da token e Shqypnisë,

Për me mbajt klyshtë e Rusisë?

Këto janë vargjet e ashpra që shkroi At Gjergj Fishta për Evropën, e të cilat i hasim shpesh duke qarkulluar në Facebook e rrjete tjera sociale të Internetit, kur herë pas here BE-ja po bën ndonjë padrejtësi ndaj vendit tonë.

Së fundi, BE-ja na zhgënjeu me mosliberalzimin e vizave edhe pse i përmbushëm të gjitha kriteret. Bash të gjitha. 95 sosh.

Sidoqoftë, Kosova mbetet një ndër vendet më pro-evropiane në Evropë e në botë, duke mos harruar kontributin e madh në lirinë dhe pavarësinë e saj. Frustrimi i saj me Evropën nuk është përmbledhur për fat të mirë ende në një qëndrim të artikuluar politik që njihet si euro-skepticizëm. Kemi belbëzime të aty-këtushme dhe natyrisht, vargjet e Fishtës. Reagimi shpërthehet shpejt si një fluskë sapuni, dhe pro-evropianizmi mban forcën.

Duke ruajtur sentimentin pro-evropian, Kosova sot e feston zyrtarisht Ditën e Evropës, 9 majin. Është vendi i vetëm në Evropë që e bën një gjë të tillë, shkruan Periskopi.

Por, së fundi reagimet kundër Ditës së Evropës dhe në përgjithësi rikthimi te vargjet e Gjergj Fishtës për Evropën, po bëhet gjithnjë e më i hapur. Deputetja e PDK-së me emrin Blerta dhe mbiemrin Deliu, doli kundër festimit në fjalë.

Edhe shefi i saj, Kadri Veseli, e kishte fyer BE-në duke e cilësuar si raciste muaj më parë shkaku që nuk po i liberalizonte vizat. “Kemi gjak të pastër” – kishte thënë kryetari i Kuvendit.

Më tej, edhe Hashim Thaçi, që aktualisht kryen detyrën e presidentit [por jo vetëm] të vendit, është shprehur shumë i pakënaqur me trajtimin që po i bën BE-ja Kosovës në një varg deklaratash të ndryshme që kryesisht e sulmonin qëndrimin jo-unitar në lidhje me statusin e vendit, dhe me tolerimet që i bënte Serbisë.

A janë riaktualizuar përfundimisht fjalët e At Gjergj Fishtës në lidhje me Evropën?