Dështon gjykimi ndaj Bujar Bukoshit, për herë të tetë

Ka dështuar për të tetën herë të mbahet gjykimi në rastin ku po akuzohen ish-ministri i Shëndetësisë, njëherësh edhe ish-zëvendëskryeministri i Kosovës, Bujar Bukoshi, ish-sekretari i përhershëm i Ministrisë së Shëndetësisë, Ilir Tolaj dhe të tjerëve, për vepra penale që lidhen me shpërdorimin e detyrës apo autoritetit zyrtar.

Bashkë me Tolaj e Bukoshin, po akuzohen edhe Arbenita Pajaziti, Hajrullah Fejza, Zenel Kuqi dhe Bekim Fusha.

Seanca ndaj tyre ishte paraparë për të premten në Gjykatën Themelore në Prishtinë, po ajo ka dështuar për shkak se ka munguar anëtarja e trupit gjykues, Valbona Musliu- Selimaj dhe i akuzuari Bujar Bukoshi.

Kryetarja e trupit gjykues, Naime Krasniqi – Jashanica, bëri të ditur se anëtarja e trupit gjykues është e zënë me rregullimin e disa dokumentacioneve të saj për udhëtim zyrtar.

Sa i përket të akuzuarit Bukoshi, ajo ka thënë se avokati i tij, Besnik Berisha, ka qenë i informuar për seancën e së premtes, dhe nuk ka parashtruar asnjë shkresë.

Ndryshe, e akuzuara Arbenita Pajaziti, në gjykatore është paraqitur me vonesë, respektivisht pas konstatimit të shtyrjes së seancës.

Ky gjykim pritet të mbahet më 11 qershor, me fillim nga ora 13:00.

Ndryshe, më 12 prill, në gjykimin që kishte dështuar të mbahet, gjykatësja Naime Krasniqi-Jashanica, kishte deklaruar se aktakuza e ndryshuar ka shkaktuar dilema në këtë rast.

Për të kërkuar sqarime rreth kësaj, ajo kishte thënë se i ishte drejtuar edhe Zyrës së Kryeprokurorit të Shtetit, por që sipas saj, ende nuk është marr përgjigje, raporton “Betimi për Drejtësi”.
Gjykatësja Krasniqi-Jashanica, kishte thënë se ka pritur edhe prokuroren e rastit, Fikrije Fejzullahu për të dhënë sqarimet e kërkuara, mirëpo për shkak se ajo ka munguar në seancë, një gjë e tillë është pamundësuar.

Sipas saj, gjykata sipas detyrës zyrtare duhet të veprojë sipas aktakuzës së ushtruar, duke iu referuar vlerësimit të kohës së kryerjes së veprës penale dhe për disa pika të aktakuzës, ajo kishte thënë se tanimë ka arritur parashkrimi absolut.

Shkak për dështimin e seancës ishte bërë mungesa e prokurores speciale, Fikrije Fejzullahu dhe të akuzuarve Bujar Bukoshi, Arbenita Pajaziti e Zenel Kuqi.

Ndryshe, në seancën e 31 tetorit të vitit 2018 që kishte dështuar të mbahet, avokati i Bujar Bukoshit kishte kërkuar të veçohet procedura ndaj klientit të tij.

Që nga kthimi i rastit në rigjykim, i akuzuari Bukoshi nuk ka qenë asnjëherë në gjykatore.
Derisa, në seancën e mbajtur më 5 qershor 2018, prokurorja speciale Fikrije Fezullahu kishte bërë ndryshimin e aktakuzës në këtë rast.