Daçiq: Kosovarët shpejt do t’i kalojnë vijat e kuqe, e aty ndërkombëtarët nuk i durojnë

Ivica Daçiq, ministër i jashtëm i Serbisë, nuk pret diçka të madhe lidhur në raport me Kosovën në takimin e 1 korrikut në Paris, takim i organizuar sërish nga kancelarja Merkel dhe presidenti Macron.

Ai ka thënë se pret që të përsëritet presioni ndaj Serbisë edhe në këtë samit, sidomos për çështjen e njohjes, por ka thënë se ‘Serbia nuk ka të bëjë asgjë me këtë çështje”.

“Kjo nuk do të pranohet nga presidenti Vuçiq apo qeveria jonë”, ka thënë Daçiq për Tanjug, shkruan Periskopi.

“Është një kohë e gjatë deri më 1 korrik që të parashikojmë se çka mund të ndodh. Së pari, do të jenë zgjedhjet që mbahen në Europë dhe ato duhet të përfundojnë, pastaj duhet të presim rezultatet e zgjedhjeve”, ka thënë ai.

Daçiq ka thënë se Haradinaj dhe pala kosovare kanë një mbështetje ‘nga brenda’ për veprimet që po bëjnë mirëpo ka shtuar se ‘mbështetja e komunitetit ndërkombëtar ka limite’.

“Sigurisht se ata kanë mbështetje nga vetë ata që i kanë krijuar por kjo mbështetje ka edhe limite, ka edhe vijat e kuqe të saj dhe mendoj se ata (pala kosovare v.j.) së shpejti do t’i shkelin edhe këto vija të kuqe sepse kjo është mënyra se si veprojnë ata”, ka thënë Daçiq.