Analisti Maliqi: Curri duket qartë se ka bashkëjetu me elitën tonë politike

Analisti kosovar Agon Maliqi e ka bërë një postim në Facebook pas aksionit të sotëm në veri të Policisë së Kosovës ku u arrestuan të paktën 11 njerëz, të dyshuar për vepra të ndryshme kriminale.

Z.Maliqi e ndërlidh aksionin e sotëm me atë që ndodhi javën e kaluar në Prishtinë, në rastin e Fajdeve, ku u përmend edhe emri i kryetarit të Kuvendit, z.Kadri Veseli nga njëri prej të dyshuarve, shkruan Periskopi.

Maliqi thotë se “struktura ndëretnike e krimit të organizuar ka edhe adresa politika të cilat i kanë mundësuar të jetojë e qetë dhe të kthehet në kërcënim për sigurinë kombëtare”.

Më tej ai përmend një prej të dyshuarve për rastin e Fajdeve, të njohurin si Curri, për të cilin beson se ka bashkëjetuar pa problem me elitën tonë politike.

Ky është statusi i plotë i tij në Facebook:

Struktura ndëretnike e krimit të organizuar e cila prej vitesh bashkëpunon pa probleme mes jugut dhe veriut – që u shënjestrua javën e kaluar në Prishtinë dhe sot në veri – ka edhe adresa politike të cilat i kanë mundësuar të jetojë e qetë dhe të kthehet në kërcënim për sigurinë kombëtare. Bile ka edhe adresa mediatike (“follow the money”). Kjo punë nuk mundet të përfundojë dhe të përmbyllet me spektakle patriotike por duhet të ketë edhe llogaridhënie politike. Ky Curri psh. duket qartë se ka bashkjetu pa problem me elitën tonë politike. Para ca kohe e provokova një zyrtar të lartë të NATO-s, meqë dukej se kishte qasje në informata shumë të klasifikuara, dhe e pyeta se kush e kontrollon kë në kontrabandën në veri: politika krimin, apo krimi politikën? Qeshi. “Nuk mund të të them më shumë, por janë tepër të ndërlidhura”.