Albin Kurti e quan presidentin Thaçi ‘ekstremist’: I përkujton letrën

Albin Kurti duket se është tmerrësisht i mirë në mbamendjen e datave të caktuara. Kryetari i Vetëvendosjes ka përkujtuar katër-mujorin e dërgimit të letrës nga Presidenti i Kosovës Hashim Thaçi te presidenti i ShBA-ve, Donald J.Trump.

Z.Kurti përmend në veçanti paragrafin 3 të asaj letre ku thuhej: “Më lejoni t’ju siguroj personalisht se si President i Kosovës unë do të jem i gatshëm dhe i vullnetshëm të bëj kompromiset e nevojshme për të arritur një marrëveshje gjithëpërfshirëse dhe të balancuar…”.

Deputeti në fjalë konsideron që ky paragraf paraqet nënshtrueshmërinë dhe dorëzimin e Kosovës ndaj Serbisë.

Sidoqoftë, Kurti paraqet edhe një tezë ku si ‘ekstremist’ nuk e cilëson vetëm atë që ‘a priori nuk do dialog por edhe atë që a priori do marrëveshje’. Ai nuk jep kurrfarë reference apo mbështetje për qëndrimin e tij, sipas të cilit Lëvizja e tij që nuk është a priori kundër dialogut del nga ekstremizmit si qëndrim por futet Hashim Thaçi, presidenti i Kosovës.

Më poshtë e keni postimin e plotë të z.Kurti. /Periskopi

Si e sabotoi Presidenti vetveten

Katër muaj u bënë sot nga letra të cilën Presidenti i Kosovës ia dërgoi Presidentit të ShBA-ve, z. Donald Trump. Paragrafi 3 ishte interesant aty, andaj le ta përkujtojmë: “Më lejoni t’ju siguroj personalisht se si President i Kosovës unë do të jem i gatshëm dhe i vullnetshëm të bëj kompromiset e nevojshme për të arritur një marrëveshje gjithëpërfshirëse dhe të balancuar…”.

Pra, edhe i gatshëm edhe i vullnetshëm për kompromiset e nevojshme! Jo vetëm i gatshëm, por edhe i vullnetshëm. Jo ndonjë kompromis, por kompromiset e nevojshme. Me këso gatishmërie e dëshire nuk mund të ketë dialog e marrëveshje, por veçse pazar (personal) për kapitullim (shteti). Kur je tepër fleksibil karshi Serbisë, kjo tashmë nuk paraqet më fleksibilitet, por nënshtrim e dorëzim. Rrjedhimisht, nuk mund të ketë dialog me këso gatishmërie e vullneti paraprak për kompromiset e nevojshme.