Tërshani: Ende nuk kemi arsye për festë, më 8 mars protestojmë

Në Prishtinë, marshi protestues do të nisë në ora 12:00 në sheshin “Zahir Pajaziti”, e sot gjatë orëve të mbrëmjes janë vendosur edhe posterë me mbishkrimet “Ka ardhë koha”, raporton Periskopi.

Aktivistja për të drejtat e njeriut, me fokus te të drejtat e grave, Adelina Tërshani, ka thënë për Periskopin se sivjet ky marsh do të fokusohet te çështja e dhunës ndaj vajzave e grave.

“Marshojmë S’festojmë sivjet do të mbahet edhe në komuna të tjera si Prizreni, Ferizaji e Mitrovica, kjo i bie që domosdo do të kemi pjesëmarrje të madhe qytetare. Sa i përket këtij në Prishtinë, pjesëmarrja gjithmonë ka qenë e madhe e veçanërisht këtë vit kur fokus i marshit do të jetë dhuna ndaj vajzave dhe grave që po ushtrohet edhe nga institucionet të cilat e kanë për detyrë të na mbrojnë prej saj. Gratë po vriten e dhunohen çdo ditë dhe kudo, ato po ngacmohen seksualisht po diskriminohen në vend të punës e në qasje në punë, gratë po objektivizohen, gratë nuk po trashëgojnë pronë, gratë nuk po janë të lira të vendosin vet për trupat e tyre prandaj ende nuk ka arsye për me festu, duhet me protestu”, ka thënë Tërshani për Periskopin.

Marshojmë, s’festojmë tashmë është bërë marsh tradicional në Kosovë, që për çdo 8 mars, në vend të festës, zgjdhin të protestojnë dhe të ngrisin zërin për të drejtat e grave./PERISKOPI/