Prokuroria nis hetimet për skandalin me stimulues seksi në shkollën e Erdoganit në Prizren

Këtë e kanë konfirmuar në Prokurorinë Themelore në Prizren.

“Prokuroria Themelore në Prizren, për rastin në Shkollën Ndërkombëtare “Maarif” ka autorizuar Policinë për grumbullimin e informacioneve dhe provave të nevojshme. Andaj, për rastin në fjalë Prokuroria do të veproj konform dispozitave ligjore”, thuhet në përgjigjen dërguar gazetës inFokus.

Fillimi i hetimeve konfirmohet edhe nga Policia rajonale e Prizrenit.

“Mund të konfirmojmë se Policia në Prizren në bashkëpunim me Prokurorinë e shtetit po në Prizren ka filluar hetimet në lidhje me rastin të cilin ju veç e keni bërë të ditur për opinionin publik. Tani është faza e parë e hetimeve dhe nuk mund te japim informata tjera” tha zëdhënësi i Policisë për rajonin e Prizrenit, Vesel Gashi.

Përdorimin e stimuluesve seksual nga nxënësit, drejtoria e “Shkollës Ndërkombëtare Maarif”, e kishte konsideruar si diçka të pa rëndësishme që nuk kërkonte ndërhyrjen e organeve të drejtësisë.

Gazeta inFokus kishte raportuar për rastin që kishte ndodhur me 23 janar të këtij viti, kur një nga nxënësit e “Shkollës Ndërkombëtare Maarif” në Prizren kishte sjellë në shkollë disa pako me substanca stimuluese seksuale të llojit “Kamagra”. (Kamagra është një lloj stimuluesi seksual i ngjashëm me Viagra – molekula Sildenafil).

Bashkë me dy shokë të tjerë u kishte shitur nga një euro këtë barë së paku dhjetë nxënësve të kësaj shkolle me arsyetimin se do t’ua rriste inteligjencën.

Por, mosinformimi i policisë dhe fshehja e kësaj ngjarjeje për organet kompetente nga ana e drejtorisë së shkollës dhe personave të tjerë të përfshirë, po konsiderohet vepër penale. (LINKU)

Ehat Miftaraj nga Instituti i Kosovës për Drejtësi ka thënë për gazetën inFokus se veçanërisht në rastet kur cenohet shëndeti apo integriteti i nxënësve është obligim ligjor i drejtorit dhe të gjithë personave të përfshirë që të raportojnë në Policinë e Kosovës.

E tërë situata, në të cilën është përfshirë edhe fëmija i një politikani kosovar, është mbajtur e fshehtë nga udhëheqësit e shkollës dhe vetë prindërit, gjë që konsiderohet të jetë vepër penale.

“Sigurisht është vepër penale, sepse përdorimi i tyre nga persona të mitur apo në ato raste kur medikamente apo këto substanca u jepen personave pa vullnetin, pa dëshirën e tyre, kemi të bëjmë me vepër penale, cenim të integritetit të personave, qoftë të mitur apo personave që pa dijeninë e tyre mund të përdorin substanca të tilla. Për këtë arsye është e domosdoshme që të informohen organet e ndjekjes të informohet policia por edhe zyrtarët e komunës përkatëse të cilat merren me shëndetin publik” tha Miftaraj për gazetën inFokus.