Isa Mustafa mban konferencë për media, do të tregojë detaje nga takimi me Thaçin

Kryetari i LDK’së, Isa Mustafa, do të mbajë një konferencë javën e ardhshme, ku do të flasë më në detaje për takimin që ka pasur me presidentin e Kosovës Hashim Thaçi.

Kjo u bë e ditur në konferencën për media të LDK’së, ku folën shefi i GP të kësaj partie, Avdullah Hoti dhe zëdhënësi i partisë, Besian Mustafa.

Duke folur për idenë e presidentit Thaçi për korrigjimin e kufijve dhe duke e paraqitur si ‘një ide të rrezikshme për Kosovën’, më pas gazetarët e kanë pyetur Hotin se a i ka paraqitur të gjitha këto qëndrime kreu i LDK’së gjatë takimit me Thaçin, përcjell Periskopi.

Në këtë rast, ka ndërhyrë zëdhënësi i LDK’së, Besian Mustafa, i cili tha:

“Sa i përket takimit të kryetarit Mustafa, kryetari Mustafa do të jetë në konferencë personalisht javën e ardhshme, kështu që mund t’ia adresoni pyetjet atij javën e ardhshme”,.

Ndryshe, dje Isa Mustafa ka njoftuar përmes një shkrimi në Facebook, për takimin që pat me Presidentin Thaçi, në orët e vona të së mërkurës.

Mustafa njoftonte:

“Mbrëmë e takova Presidentin Thaçi në shtëpinë time. Kërkoi të më informoj, si kryetarin e partisë më të madhe politike, për kërkesat por edhe paralajmërimet për masa, shumë serioze, ndaj Kosovës, të deklaruara nga delegacioni i lartë i SHBA-së.  Ia shpreha brengosjen time dhe të LDK-së për situatën në të cilën koalicioni qeverisës e ka sjellë vendin. Kërkova nga Presidenti që të heq dorë nga orientimi i tij dhe diskursi politik për korrigjim të kufijve, në mënyrë që të krijohet një ambient normal për dialog dhe të evitohet frika nga dialogu. Se LDK nuk do të pajtohet ne asnjë mënyrë që të dialogohet për territorin, sepse kjo qon në rihapje të shtetësisë. Poashtu, theksova se është përgjegjësi e koalicionit qeverisës që të gjej zgjidhje, në mënyrë që të ruhet partneriteti me SHBA-të, si aleatin tonë strategjik. Ia shpreha qëndrimet e LDK-së për dialogun dhe nevojën që para dialogut të shkohet në zgjedhje, për të siguruar legjitimitetin.  Kam vërejtur se ka pasur spekulime si dhe akuza për këtë takim; disa budallenjë e kanë cilësuar edhe si tradhti. Të tillët janë injorantë e zjarrëvënës. Kur është në pyetje interesi i shtetit dhe partneriteti me SHBA-të do të bisedoj dhe do të takohem me të gjithë, sepse i besoj programit dhe frymës së LDK-së. LDK nuk është parti diskomunikuese, nuk frikësohemi nga takimet, sepse u qëndrojmë besnik zotimeve tona politike.

Ditet e kaluara kam komunikuar edhe me Kryeministrin Haradinaj dhe me zv.kryeministrin Limaj. Më herët edhe me z. Kurti. Të gjithë ne kemi përgjegjësi për këtë vend, si pozitë dhe si opozitë.”./Periskopi/