Gorani: Dialogu është i pashmangshëm, andaj duhet t’i tejkalojmë mosmarrëveshjet

Në seancën e jashtëzakonshme të Kuvendit të Kosovës për këtë çështje, Gorani ka thënë se përmbajtja e këtyre dy dokumenteve do të duhej të shihej si arritje e konsensusit politik të partive politike, pavarësisht përplasjeve të vazhdueshme partiake.

“Të nderuar deputetë, ju ftojë që sot të vendosni për pozitën e Kosovës në dialog. Këtu janë të përmbledhura para jush Projektligji dhe Platforma për Dialogun. Shpresoj që përmbajtjen e këtyre dokumenteve ta shihni si arritje e konsensusit politik të partive. Duke qenë si propozues, PSD është munduar ta hartojë këto dokumente pavarësisht përplasjeve të pafundme partiake. Situata e tillë nuk e ndryshon një fakt politik: Dialogu është proces i pashmangshëm i cili patjetër duhet të fillojë dhe patjetër duhet të mbyllet. Nëse si proces i pashmangshëm, rrugëdalja nga ngecja e deritanishme duhet të jetë e domosdoshme”, ka thënë Gorani.

Tutje ai ka thënë se Projektligji dhe Platforma për Dialogun janë dokumente të përpiluara në një kohë të paqartësive të mëdha ndërkombëtare dhe në kulmin e spekulimeve për ndarjen e vendit dhe shkëmbimin e territoreve.

“Shpresoj që hartimet e propozuara t’i shihni si përpjekje për siguresa për një proces të pasigurt dhe të vështirë. Shpresoj t’i kuptoni si përpjekje për të arritur konsensus. Të vendoset një baraspeshë mes ambicieve partiake e shtetërore. Ideale do të ishte ta kishim një shumicë parlamentare që do të prezantonte Kosovën në dialog. Tash e sa kohë fokusi është te problemi, e jo te gjetja e një zgjedhjeje. Duhet të vendosim për atë që është optimale, duhet ta arrijmë emëruesin e përbashkët për këtë proces të përbashkët. Jam i bindur se Projektligji e Platforma ngërthejnë në vete synimet shtetërore dhe shqetësimet shoqërore. Këto dokumente duhet të shiheni si guxim i hartuesve të tyre që të marrin guxim në këtë proces”, ka thënë tutje Gorani./PERISKOPI