GAP: Emërimi i Naser Shalës në AKVP dhe dorëheqja e O’Connell nga Bordi janë për keqardhje

Ky zhvillim solli reagime të shumta, përfshirë edhe dorëheqjen e ambasadorit britanik nga Bordi i Agjencisë Kosovare të Krahasimit dhe Verifikimit të Pronës.

Bekim Salihu nga Instituti GAP në RTV Dukagjini ka thënë se një zhvillim i tillë është për keqardhje.

“Kjo po tregon se institucionet e Republikës së Kosovës po shfrytëzojnë të gjitha mundësitë që po u jepen për t’i emëruar njerëzit e tyre në institucionet gjegjëse. Kjo është për keqardhje. Për keqardhje është se emërimet e tilla kanë shtyrë edhe korin diplomatik të reagojë dhe të distancohen nga veprime të tilla”.

Salihu ka thënë se pikërisht për shkak të këtyre veprimeve të tilla, shpesh organizatat e shoqërisë civile nuk marrin pjesë në komisione të tilla për të legjitimuar këto emërime.

“Ne e kuptojmë paraprakisht se thirrjet e institucioneve për të marrë pjesë në komisione të tilla, nuk janë të sinqerta. Janë thirrje formale për të arsyetuar para opinionit se pjesë e këtij vlerësimi kanë qenë edhe përfaqësuesit e shoqërisë civile”.

Përfaqësuesi i shoqërisë civile ka thënë se këto shkelje kanë ndodhur pavarësisht se  Qeveria e Kosovës ka pasur një memorandum mirëkuptimi me Ambasadën Britanike në Kosovë.

“Ambasada Britanike në Prishtinë ka pasur rol monitorues dhe vlerësues në këtë proces. Përkundër këtij roli, institucionet në formë të kundërligjshme kanë vendosur të emërojnë një person kontradiktor në një institucion shumë të rëndësishëm për vendin. Prandaj konsideroj se është një zhvillim negativ dhe një dëshmi shtesë që njerëzit e thirrur për të zbatuar ligjin po bëhen shkelës të tij”, tha ndër të tjera Bekim Salihu.