Edhe Britania e Madhe kërkon suspendim të taksës dhe kthim në dialog

“E kemi parë Serbinë duke i nxitur shtetet që ta tërheqin njohjen e pavarësisë së Kosovës dhe e kemi parë Kosovën duke i vendosur tarifa 100 përqindëshe mallrave serbe dhe atyre nga Bosnja e Hercegovina. E gjithë kjo e heq mendjen nga dialogu i lehtësuar nga BE-ja për normalizimin e marrëdhënieve,” ka thënë ministri britanik Duncan.

“Ne dëshirojmë që Kosova dhe Serbia ta kapin mundësinë për marrëveshje, duke u inspiruar nga lidershipi i Greqisë dhe asaj çfarë tani është Maqedonia e Veriut në arritjen e marrëveshjes për ta zgjidhur çështjen e shumë zgjatur të emrit. Ne besojmë se progresi në mes të Serbisë dhe Kosovës është i mundur dhe urgjentisht i nevojshëm, por se negociatat nuk duhet të jenë rreth shpejtësisë, por duhet të fokusohen në arritjen e marrëveshjes më të qëndrueshme dhe optimale,” shtoi ai.

“Ne vazhdojmë të bëjmë presion mbi të dy palët për de-eskalim të tensioneve dhe kthim në negociata. Me partnerët ndërkombëtarë, ne kemi kërkuar nga Qeveria e Kosovës që t’i vendosë hapat të cilat kanë ndërmend t’i marrin për suspendim të tarifave dhe për kthim në dialog. Është në interes të Kosovës që ta mbajë momentumin drejtë një marrëveshjeje.

“Britania e Madhe është mik i Kosovës. Ne duam që vendi dhe populli i saj të lulëzojnë dhe ne do t’i ndihmojmë ata ta bëjnë këtë. Nga ana tjetër, Kosova duhet të jetë e hapur për t’u marrë me sfidat e saj, si dhe për të festuar sukseset e saj. Që kjo të jetë efektive, Kosova do të ketë nevojë për miqtë e saj dhe jam krenar të them se ne në Mbretërinë e Bashkuar mund të llogarisim veten mes tyre,” përfundoi Duncan. /Periskopi/