Dramatike: Rrëfimi për fundin e ISIS-it, që pritet të kolapsojë brenda disa orësh

Ka një flakërime drite në qytetin e errët derisa një sulm ajror godet cakun ushtarak të ISIS-it. Pak sekonda më vonë, një top flake gllabëron gjithë lagjen.

Pesë vjet pasi ISIS-i mori territore të gjera të Sirisë dhe Irakut, gjithë çka mbetet nga ‘kalifati’ që në pikun e tij kontrollonte 10 milionë njerëz, janë disa rrugica ndanë lumit Eufrat, në qytetin e vogël shkretëtiror të Baghuzit që do t’iu merret pas disa ditësh, përkthen Periskopi.

E ngujuar në lindje e perëndim nga Forcat Demokratike Siriane të udhëhequra nga kurdët dhe nga regjimi sirian dhe Rusia në anën tjetër të lumit, kalifati duket më pak se një ferr me tym dhe zjarr. Nuk ka mbetur asnjë rrugë për ushtarët që të largohen.

Ofenziva ushtarake rinisi sapo u evakuuan gratë dhe fëmijët nga qyteti, madje me një intensitet që nuk ishte parë as në qytetet e mëdha, si Mosul dhe Raqqa.

Snajperistët e ISIS-it, bombat vetëvrasëse dhe raketat po parandalojnë Forcat Demokratike Siriane (FDS) që të përparojnë drejt tyre gjatë ditës. Por, kur bie nata, mosvet për ta.

“Dita është koha e tyre. Por nata është e jona,” tha Memo Wan, një komandant i FDS-së.

Për disa ditë, FDS-ja ka arritur të zvogëlojë hapësirën me ISIS-in në më pak se 1 kilometër, dhe komandanti Wan thotë që terroristët janë pothuaj krejtësisht të rrethuar, me vetëm një vijë furnizimesh të pandërprerë.

“Iu kemi marrë ‘walkie-takie’-t derisa tërhiqeshin dhe i kemi dëgjuar derisa bënin panik dhe derisa flisnin se si të arratiseshin,” shtoi ai.

Mes 1 mijë dhe 1 mijë e 500 burrave besohet se janë ende të ngujuar në atë vend, bashkë me një numër të panjohur grash e fëmijësh.

“Ne prisnim që vetëm 2 mijë njerëz të largoheshin gjatë evakuimeve, por dolën më shumë se 9 mijë gra dhe fëmijë në fund, kështu që mund të ketë më shumë ushtarë të mbetur se që mendojmë,” tha komandanti tjetër, Adnan Afrin. “Kjo betejë ka qenë ekstremisht e zorshme sepse shumë ushtarë do të luftojnë deri në grahmat e fundit.”

Shërbimet e inteligjencës, përcjell Periskopi kanë thënë se shumë pengje të profilit të lartë po mbahen ende në Baghuz si mundësi për të bërë pazar lirinë e luftëtarëve të ISIS. Po ashtu, të ngujuar në qytet janë edhe dy fëmijë amerikanë, Yusuf dhe Zahra Shikder, së cilëve nëna iu vdiq nga një sulm ajror në janar.

Edhe pse disa nga luftëtarët e fundit janë fëmijë apo të lënduar, ISIS-i po refuzon që të dorëzohet. Xhihadistët i janë kthyer sulmeve vetëvrasëse duke përdorur kerre, motoçikleta e madje edhe biçikleta./Periskopi