Daçiq: Austria të ndërhyjë për grafitet ‘UÇK’, Prishtina festoi fitoren në Tuz sikur po bëhet Shqipëria e Madhe

Ministri i jashtëm serb, Ivica Daçiq ka thënë se djegia e kukullës me imazhin e përfaqësuesit të serbëve në Kroaci, Milorad Pupovac, nuk është një rast i izoluar.

Dje Daçiq ka thënë se ‘Kroacia po bën hajgare me incidente të tilla”, shkruante B92, përkthen Periskopi.

Ndërkohë Daçiq ka bërë të ditur se i është dërguar një letër Austrisë për grafitet ‘UÇK’ në Seksionin Konsulor të Serbisë në Vjenë.

“Ne nuk e kemi bërë këtë sepse Austria nuk mban përgjegjësi si shtet për këtë, por duhet të potencohet fakti se një Konsulatë nuk është siguruar dhe tani ata e dinë se duhet t’i kushtojnë më shumë vëmendje zyreve tona konsullore. Ne po përpiqemi të parandalojmë akte të tilla por duket se kjo nuk mjafton”, ka thënë sot Daçiq.

Ai ka përmendur edhe fitoren e shqiptarëve në Tuz duke thënë se deklaratat që kanë ardhur nga Prishtina për këtë fitore janë paraqitur si një ‘fitore pan-shqiptare’.

“Kështu pra, kemi një retorikë nacionaliste dhe fashiste dhe thirrje për t’i persektuar serbët, derisa në Prishtinë vazhdon të qëndrojë problemi taksës së vendosur ndaj produkteve tona. Ndërkohë, është e habitshme se si komuniteti ndërkombëtar na kujton që duhet t’i ikim retorikës për Serbinë e Madhe duke e përmendur gjithmonë si një rrezik”, ka thënë ai.

Megjithatë Daçiq thotë se ‘me gjithë këto vështirësi, pozicioni aktual i Serbisë është shumë i mirë”.

“Pozicioni i Serbisë është shumë i mirë sepse ne nuk jemi pala që po pengon dialogun dhe nuk kemi marrë veprime të njëanshme që do ta dëmtonin procesin apo do të shkaktonin incidente. Ne kemi arritur të tërheqim 13 njohje të Kosovës”, ka thënë ai./Periskopi/