360 vjedhje e 26 raste të grabitjeve ndodhën veç për një muaj në Kosovë

Policia në bazë të statistikave të tyre, ka treguar se gjatë periudhës janar 2019, kanë ndodhur 390 raste të vjedhjeve, kryesisht në Prishtinë, Prizren, Pejë etj. Kurse rastet e grabitjeve kanë qenë shumë më të pakta, vetëm 26 sosh. Grabitjet përfshijnë gjësendet, si çantat, telefoni e deri tek sulmi ndaj bankave e lokaleve të ndryshme biznesi.

Sipas tyre, gjatë intervenimit, zyrtarët policorë shpeshherë kanë hasur edhe në rreziqe të mëdha.

‘’Shpesh zyrtaret tanë i ekspozohen edhe rreziqeve gjatë intervenimeve policore në raste të grabitjeve të ndryshme dhe gjatë ballafaqimit me individ apo grupe kriminiale, në funksion të zbatimit të rendit dhe ligjit ka pasur edhe pasoja ku zyrtarët tanë kanë pësuar lëndime trupore apo kanë humbur edhe jetën’’, thuhet në përgjigjen e Policisë për Periskopin.

Ndërsa kur jemi tek vjedhjet, Policia njofton se ‘’Nga detyrat dhe autorizimet e përgjithshme të policisë që dalin nga Ligji për Policinë janë edhe mbrojtja e jetës, e pronës dhe ofrimi i sigurisë për te gjithë personat’’.

Policia e Kosovës vazhdimisht ka punuar në luftimin e dukurive negative dhe krijimin e një sigurie të qëndrueshme për të gjithë qytetarët e vendit, qoftë përmes planeve operacionale policore apo edhe përmes fushatave të ndryshme vetëdijesimi, thuhet më tej.

Periskopi dje raportoi edhe për numrin e grabitjeve që kishin ndodhur gjatë vitit 2018 në gjithë territorin e vendit. Sipas Policisë, gjatë asaj periudhe janë evidentuar 297 raste të grabitjeve gjithsej.

Policia ka theksuar se gjatë ndërhyrjes në këto raste, zyrtarët e tyre i janë ekspozuar rreziqeve të mëdha, deri në rrezikim të jetës, siç kishte ndodhur rasti i para tre muajve në Istog ku një polic mbeti i vrarë nga të shtënat e armëve nga ana e grabitësit.

Kujtojmë që gjatë kohës së festave të fundvitit, grabitjet më të shpeshta bëheshin nëpër marketet e mëdha ushqimore./PERISKOPI/