Pse sipas Veton Surroit kërkesa e BE’së që Trepça të jetë temë diskutimi ne dialog është e natyrshme

Gjatë ditës së djeshme, zëdhënsja e Komisionit Europian, Maja Kociajncic ka deklaruar se Trepça duhet të jetë pjesë e dialogut mes Kosovës dhe Serbisë.

Kjo deklaratë e Kocijancict u kundërshtua me të madhe nga të gjithë liderët shtetërorë, ndërsa sot publicisti Veton Surroi ka thënë se një kërkesë e tillë nga BE-ja është e natryshme.

Sipas Surroit kjo kërkesë e BE-së është ‘rrjedhë e natyrshme e parimeve udhëheqëse të cilat Kosova i ka pranuar deri më tash’.

Më poshtë e keni postimin e plotë të Veton Surroit:

“Kërkesa nga Komisioni Evropian që statusi i“Trepçës” të jetë pjesë e negociatave mes Kosovës dhe Serbisë është rrjedhë e natyrshme e parimeve udhëheqëse të cilat Kosova i ka pranuar deri më tash. Përgjatë shtatë viteve të kaluara , Kosova ka pranuar të bisedojë me Serbinë, dhe të pajtohet me të , për mënyrën se si do të organizohen komunat e Kosovës (Bashkësia e Komunave Serbe), çfarë nacionaliteti duhet doemos të kenë komandanti i policisë dhe gjykatësit e apelit në Mitrovicën e Veriut dhe çfarë lartësie duhet të jetë muri i rrethrrotullimit në pjesën veriore të qytetit të Mitrovicës.
Për zyren e Zonjës Mogherini është e qartë se nëse Kosova ka pranuar të bisedojë dhe të dakordohet për të gjitha këto çështje që duhet të ishin pjesë e sovranitetit të Kosovës, do të pranojë të bisedojë edhe për “Trepçën”.
Është mësim i mirë për spektrin politik kosovar pse duhet kaluar prej procesit negociator të “normalizimit” në procesin negociator të “Marrëveshjes gjithpërfshirëse” me vlerësim të procesit të deritanishëm e me parime të reja e të dakorduara udhëheqëse.,”. /Periskopi/