Pas mesazhit të Haradinajt edhe Qeveria lëshon kumtesë: Qëndrimi i BE’së për Trepçën cënon sovranitetin e Kosovës

Qeveria e Republikës së Kosovës, ka reaguar edhe përmes një deklaratë ndaj zëdhënëses së Komisionit Evropian, Maja Kocijancic, e cila për mediat serbe tha se ‘Trepça duhet të jetë pjesë e dialogut’.

Sipas Qeverisë, një qëndrim i tillë cenon sovranitetin e shtetit të Kosovës.

Kështu shkruan Qeveria:

Qeveria e Republikës së Kosovës e quan të papranueshëm reagimin e Bashkimit Evropian kundër miratimit të Statutit të Trepçës, nga Kuvendi i Republikës së Kosovës.

 Qeveria e Republikës së Kosovës vlerëson se deklarata e zëdhënëses së Komisionit Europian, Maja Kocijancic, dhënë mediave serbe, se Trepça duhet të jetë pjesë e Dialogut është qëndrim i paprecedent, i papranueshëm dhe, si i tillë cenon sovranitetin e shtetit të Kosovës.

 Njëkohësisht, Qeveria e Republikës së Kosovës thekson se Trepça nuk është çështje e hapur mes Kosovës dhe Serbisë dhe në asnjë moment populli i Kosovës dhe institucionet e saj nuk do të lejojnë krijimin e temave false që kanë qartazi qëllim ndarjen e Kosovës.

Ndërkohë, pak më herët, ka qenë edhe vetë kryeministri Haradinaj që përmes një mesazhi në Facebook, ka shkruar se me këtë qëndrim, BE tregon se i ka humbur rruga në oborr.

“Reagimi i BE-së kundër miratimit të Statutit të Trepçës nga Kuvendi i Republikës së Kosovës është dëshmi se BE-së i ka humbur rruga në oborr. Deklarata e zëdhënësës së Komisionit Europian, Maja Kocijancic, dhënë mediave serbe, se Trepça duhet të jetë pjesë e Dialogut është qëndrim i papresedan, i papranueshëm dhe, si i tillë cenon sovranitetin e shtetit të Kosovës. Trepça nuk është çështje e hapur mes Kosovës dhe Serbisë dhe në asnjë moment populli i Kosovës dhe institucionet e saj nuk do të lejojnë krijimin e temave false që kanë qartazi qëllim ndarjen e Kosovës./Periskopi/